Рөстәм Миңнеханов: Татарстан белән Абхазиянең хезмәттәшлекне үстерү өчен барлык мөмкинлекләре дә бар

Татарстан белән Абхазия Республикасы арасында товар әйләнешен үстерү, хезмәттәшлекне активлаштыру өчен барлык мөмкинлекләр дә бар. Бүген бу хакта Татарстан Республикасы Президенты Рөстәм Миңнеханов Абхазия Республикасы вице-премьеры,  икътисад министры Кристина Озган белән очрашуда хәбәр итте.

Очрашу ТР Хөкүмәт Йортында узды.

Исегезгә төшерәбез, Абхазия Республикасының икътисад министры Кристина Озган җитәкчелегендәге делегациясе Казанга кичә, 30 гыйнварда, килде. Делегация вәкилләре ТР Икътисад министрлыгында очрашулар уздырдылар, шулай ук ТР Инвестицион үсеш агентлыгында булдылар, анда аларга Татарстанның инвестицион проектлары тәкъдир ителде.

Без бик тәэсирләндек, диде Кристина Озган, һәм Татарстанның төрле юнәлешләр буенча тәҗрибәсен өйрәнү мөмкинлеге өчен рәхмәт белдерде. Ул Абхазия Президенты Аслан Бжаниянең 2022 елда Татарстанга килүен искәртте. Шуннан соң Абхазия коллегалары делегациясен Татарстан тәҗрибәсен өйрәнү өчен җибәрергә дигән карар кабул ителде.

Рөстәм Миңнеханов, үз чиратында, Татарстан белән элемтәләрне үстерү белән кызыксынулары өчен рәхмәт белдерде. Ул искәрткәнчә, Россия Федерациясе Абхазия Республикасын суверен бәйсез дәүләт дип таныды, хәзер союздашлык һәм стратегик партнерлык турында килешү гамәлдә, хокукый базаны ныгыту, икътисад, гуманитар өлкә өлкәсендә килешүләр төзү буенча эш алып барыла, моннан тыш, сәүдә-икътисадый хезмәттәшлек буенча Россия-Абхазия хөкүмәтара комиссиясе эшли, Россия ягыннан аның рәистәше - Россия Федерациясе Хөкүмәте Рәисе урынбасары Марат Хөснуллин.

«Татарстанның Абхазия белән мөнәсәбәтләре күптәнге һәм аның тарихы бар, - дип искәртте Рөстәм Миңнеханов. - 1994 елның августында безнең республикалар арасында Дуслык һәм хезмәттәшлек турында килешү имзаланды. Абхазия делегацияләре республикабызда төрле чараларда даими катнаша. Татарстан белән Абхазия арасында товар әйләнеше зур түгел, әмма яхшы динамика бар».

Татарстан Абхазиягә «КАМАЗ» йөк машиналарын, шиннар, машина төзелеше продукциясе, химия һәм нефть химиясе продукциясе, медицина, фармацевтика товарларын китерергә, шулай ук территориаль үсеш, заманча шәһәр инфраструктурасын булдыру, инвестицияләр җәлеп итү өлкәсендәге тәҗрибә һәм эшләнмәләр белән уртаклашырга әзер.

Рөстәм Миңнеханов туризм өлкәсен һәм шифаханә-курорт юнәлешен хезмәттәшлектә үсеш ноктасы дип атады.

Ул шулай ук килешү кысаларында муниципальара хезмәттәшлек турында искәртте. Шулай итеп, ике муниципалитет - Нурлат һәм Гудаут районнары арасында хезмәттәшлек турында килешү бар (2015 елдан).

Абхазия Республикасы делегациясе белән очрашуда Татарстан Республикасы икътисад министры Мидхәт Шаһиәхмәтов, Татарстан Республикасы сәнәгать һәм сәүдә министры Олег Коробченко, Казан мэры Илсур Метшин һәм башкалар катнашты.

Исегезгә төшерәбез, делегация программасында – «КАМАЗ» ГАҖда булу, «Алабуга» МИЗ эшчәнлеген өйрәнү, Иннополис шәһәре белән танышу, «Химград» технополисында булу һәм башкалар.