Татарстан Президенты: Тикшерү идарәсе РФ Тикшерү комитетының территориаль органнары арасында алдынгы позицияне саклый

Тикшерү идарәсе РФ Тикшерү комитетының территориаль органнары арасында алдынгы позицияне саклый. Бүген бу хакта Татарстан Республикасы Президенты Рөстәм Миңнеханов Россия Тикшерү комитетының ТР буенча Тикшерү идарәсенең йомгаклау коллегиясендә хәбәр итте.

Рөстәм Миңнеханов ведомствоның узган еллардагы җинаятьләрне ачуда ирешкән уңышларын билгеләп үтте. Әйтик, узган елда гаепләнүчеләрнең милкенә якынча 6 млрд сумлык арест салынган, җинаятьләрдән зыян күрүчеләргә һәм дәүләткә 32 млрд сумнан артык акча кайтарылган. «Бу - сезнең барлык эшләгән елларыгызның иң яхшы нәтиҗәсе», - дип мөрәҗәгать итте ТР Президенты коллегиядә катнашучыларга.

Ул бүген ведомство алдында җитди бурычлар торуын билгеләп үтте. Махсус хәрби операция үткәрү шартларында барлык хокук саклау органнары белән берлектә иҗтимагый-сәяси вәзгыятьнең тотрыксызлануына юл куймау буенча тулы чаралар күрү бик мөһим. Җинаять эшләрен тикшерүнең оперативлыгы һәм сыйфаты өстенлекле булып кала. Бу юнәлештә уңай динамика бар. «Җинаятьләр турындагы хәбәрләрне кабул иткәндә, теркәлгәндә, тикшергәндә һәм җинаять эшләре кузгатканда, гражданнарны нигезсез җинаять җаваплылыгына тартудан сакланып, бу эшне дәвам итәргә кирәк», - диде Татарстан Президенты.

Тикшерелгән коррупция җинаятьләре саны югары булып кала. Рөстәм Миңнеханов бюджет өлкәсендә, шул исәптән илкүләм проектларны гамәлгә ашырганда, җинаятьләрне ачыклауга һәм тикшерүгә аерым игътибар бирергә, бюджет системасына һәм гражданнарга китерелгән зыянны каплау өчен барлык чараларны күрергә өндәде. «Эшне далдан сораштыру органнары, прокуратура һәм башка хокук саклау һәм контроль органнары белән тыгыз һәм конструктив хезмәттәшлектә алып барырга кирәк», - диде Татарстан Президенты.

Өстенлекле юнәлешләр арасында - намуслы эшкуарларның мәнфәгатьләрен яклау һәм республикада эшлекле климатны яхшыртуга ярдәм итү. ТР Президенты сүзләренчә, хезмәткәрләрне коммерциячел бәхәсләргә тарту омтылышларына тиз арада җавап бирергә, бизнеска басым ясау өчен хезмәт вазыйфасыннан файдаланмаска кирәк.

«Ришвәтчелек, торак-коммуналь комплекс системасында урлашу, дәүләт милке һәм бюджет акчаларын саклау турындагы законнарны бозуга бәйле җинаятьләрне нәтиҗәлерәк һәм алга таба тикшерергә кирәк. Шулай ук юридик һәм вазыйфаи затлар эшчәнлегендәге кимчелекләргә принципиаль җавап бирергә кирәк», - дип ассызыклады Рөстәм Миңнеханов.

ТР Президенты предприятиеләрдә хезмәт хакын тулысынча һәм вакытында түләү, аның минималь күләменнән дә ким булмаган хезмәт хакы түләү, яшерен бурычны ачыклау һәм «соры базар» белән көрәшү мәсьәләләренә зур игътибар бирергә өндәде.

Тагын бер мөһим мәсьәлә – террорчылык һәм экстремистик юнәлештәге җинаятьләрне ачыклау, тикшерү һәм бетерү. Хәзерге террорчылык наркобизнес белән, законсыз корал сәүдәсе, ялган акча ясау һәм тарату, капитал күчерү, аны аклау һәм хәтта юридик сәүдә фирмалары булдыру белән тыгыз бәйләнгән. «Бу күренешләрнең бернинди рәвештә дә күтәрелүенә юл куймаска кирәк. Мондый җинаятьләрне барлык дәрәҗәләрдә даими рәвештә профилактикалау, социаль тотрыклылык куркынычларын вакытында ачыклау зарур», - дип белдерде ТР Президенты.

Ул балаларга карата көч куллану кебек мөһим темага аерым тукталды. Балаларның иминлеген тәэмин итү алдан ук чаралар комплексын кабул итүне таләп итә, диде Рөстәм Миңнеханов, балаларның социаль иминлеге проблемалары, аларны мөмкин кадәр тиз һәм нәтиҗәле хәл итү – республика хакимиятенең барлык тармакларының даими эше предметы.

Республика Президенты гражданнарның гаризаларын һәм мөрәҗәгатьләрен карау буенча башкарылган эшне уңай бәяләде, бу исә халыкның ведомствога ышанычын арттыруга ярдәм итә.

«Ышанам ки, Тикшерүкомитетының Тикшерү идарәсе профессиональ коллективы куелган барлык бурычларны да үти алачак», - дип өстәде Рөстәм Миңнеханов.

Аннары ТР Президенты ведомствоның алдынгы хезмәткәрләренә Татарстан Республикасы дәүләт бүләкләре тапшырды.

Идарә җитәкчесе Валерий Липский үз докладында хәбәр иткәнчә, теркәлгән җинаятьләр саны аз гына арткан очракта (0,5%ка, 51 мең 933тән 52 мең 189га кадәр), аеруча авыр һәм авыр җинаятьләр саны узган елда 4,4%ка кимегән (15 мең 534тән 14 мең 843кә кадәр). Тикшерү идарәсенә җинаятьләр турында 9 меңгә якын хәбәр килгән, бу 2021 ел дәрәҗәсеннән 7%ка кимрәк. 5 меңнән артык җинаять тикшерелгән, бу 2021 ел белән чагыштырганда 13,2% ка күбрәк. Тикшерелгән авыр һәм аеруча авыр җинаятьләр саны 10,7%ка (1 мең 943 тән 2 мең 150гә кадәр) арткан.

Суд алдына 41 җинаять кылган җинаятьчел төркемнәрнең 24 әгъзасы баскан. Судка коррупциягә бәйле 640тан артык җинаять тикшерелгән. Судка 253 гаепләнүче җибәрелгән. Балигъ булмаганнарга карата җинаятьләргә каршы көрәш аерым урында кала бирә. 800 ән артык җинаять буенча җинаять эшләре кузгатылган, бу 2021 ел дәрәҗәсеннән 20%ка кимрәк. Узган еллардагы 129 җинаять ачылган һәм тикшерелгән, бу 2021 ел белән чагыштырганда 14,2%ка күбрәк. 69 авыр һәм аеруча авыр җинаять кылуда гаеплеләр ачыкланган.

Җинаять кылуга китергән хәлләрне бетерү турында 2700гә якын күрсәтмә кертелгән, төрле җаваплылыкка ике меңнән артык зат тартылган.