Рөстәм Миңнеханов Татарстанның ректорлар корпусы вәкилләре һәм фәнни оешмалары җитәкчеләре белән очрашты

Бүген Татарстан Республикасы Президенты Рөстәм Миңнеханов ректорлар корпусы вәкилләре һәм фәнни оешмалар җитәкчеләре белән очрашты.

Очрашу ТР Хөкүмәт Йортында узды, анда ТР Премьер-министры урынбасары Ләйлә Фазлыева, ТР Президенты Администрациясе Җитәкчесе Әсгать Сәфәров һәм башкалар катнашты.

Рөстәм Миңнеханов билгеләп үткәнчә, республикада яңа ел алдыннан фән вәкилләре белән очрашу, 2022 елга йомгак ясау һәм яңа бурычлар билгеләү күркәм традициягә әверелде. Ул Татарстанның фәнни-мәгариф комплексы узып баручы елда, авырлыкларга карамастан,  лаеклы эшләде, дип ассызыклады. Югары уку йортлары һәм тикшеренү учреждениеләре «Фән һәм университетлар» илкүләм проектында, илнең социаль-икътисадый үсешенең башка стратегик инициативаларында үз урыннарын саклап кала алдылар.

Безнең фән һәм мәгариф системасы Татарстанга илнең мөһим фәнни, мәгариф, сәнәгать үзәкләренең берсе булып калырга мөмкинлек бирә, диде Рөстәм Миңнеханов. Ул Татарстан төбәкләрнең фәнни-технологик үсешенең илкүләм рейтингында 5 нче урында торуын искәртте.

Татарстан югары белем бирү системасын үстерү йомгаклары һәм аны модернизацияләү буенча беренче чираттагы бурычлар турында ТР югары уку йортлары ректорлары советы рәисе – Казан федераль университеты ректоры Ленар Сафин сөйләде. Ул, аерым алганда, бүген төп бурычларның берсе – фән һәм сәнәгатьнең интеграциясен нәтиҗәлерәк тәэмин итү, дип билгеләп үтте.

Ленар Сафин республикада әйдәп баручы университетлар базасында дүрт инженерлык мәктәбе булдыру турында җентекләбрәк сөйләде.

Моннан тыш, Татарстан «Приоритет-2030» программасында актив катнаша, ул югары уку йортларына үсеш өчен грантлар алырга мөмкинлек бирә: студентлар технопаркларын, бизнес-инкубаторларны ачу, фәнни-лаборатор базаны яңарту. КФУ ректоры билгеләп үткәнчә, юагры уку йортларна республика ягыннан бик зур ярдәм бар, әмма грантлар өчен дә көрәшергә, төрле программаларда катнашырга кирәк.

«Россия Фәннәр академиясенең Казан фәнни үзәге» эшчәнлеге нәтиҗәләре һәм үсешнең өстенлекле проектлары турында директоры Алексей Калачев сөйләде.

Татарстан Фәннәр академиясенең эш нәтиҗәләре һәм киләсе елга (Милли мәдәниятләр һәм гореф-гадәтләр елы) планнары турында Татарстан Республикасы Фәннәр академиясе президенты Мәгъзүм Сәлахов сөйләде. Ул төрле халыкларның телләрен һәм традицияләрен өйрәнү өлкәсендә хезмәттәшлек турында хәбәр итте (алар арасында Кыргызстан, Төркия, Һиндстан, Үзбәкстан, Кыргызстан һәм башкалар бар).

Рөстәм Миңнеханов искәрткәнчә, илдә нибары 4 төбәкнең Фәннәр академиясе бар - Татарстанда, Башкортстанда, Чечняда һәм Якутиядә. Татарстан Фәннәр академиясе лаеклы абруйга ия һәм уникаль тәңгәллекне һәм мәдәни кодны, шулай ук республиканың күп милләтле халкының бай тарихи мирасын саклау эшенә зур өлеш кертә, дип ассызыклады Татарстан Президенты.