Татарстан Президенты республика Дәүләт Советының чираттагы утырышында катнашты

Татарстан Президенты Рөстәм Миңнеханов алтынчы чакырылыш ТР Дәүләт Советының утыз сигезенче утырышында катнашты. Шулай ук эштә республика Хөкүмәте әгъзалары һәм чакырылганнар катнашты. Утырышны Дәүләт Советы Рәисе Фәрит Мөхәммәтшин үткәрде.

Президиум карары нигезендә, көн тәртибенә 14 мәсьәлә кертелгән, шул исәптән алты республика законы проекты. Фикер алышудан соң сораулар саны 18гә кадәр артты.

Әйтик, Дәүләт Советы алкоголь продукциясе базарын законлы җайга салуны камилләштерү буенча закон чыгару инициативасын РФ ФС Дәүләт Думасына җибәрәчәк. Законлылык һәм хокук тәртибе комитеты рәисе урынбасары Александр Чубаров, Татарстан парламенты инициативасын тәкъдим итеп, узган ел ТР буенча эчке эшләр органнары тарафыннан этил спирты, алкогольле һәм спиртлы продукциянең легаль булмаган әйләнешенә каршы көрәш кысаларында 112 җинаять ачыкланды, 1 меңнән артык административ хокук бозу ачыкланды, 207 меңнән  литр ялган алкогольле һәм спиртлы продукция тартып алынды, дип аңлатты. Быел 81 җинаять һәм 315 хокук бозу ачыкланган, әйләнештән 215 мең литр легаль булмаган алкоголь алынган.

Хәзерге вакытта физик затлар өчен административ һәм җинаять җаваплылыгы бары тик алкогольле һәм спиртлы азык-төлек продукциясе сатылган очракта гына билгеләнә. Этил спирты һәм спиртлы азык-төлек булмаган продукция саткан очракта административ хокук бозулар турында гамәлдәге законнарда гражданнарның җаваплылыгы каралмаган. Эшләнгән закон проекты тарафыннан физик затларның, вазыйфаи затлардан һәм юридик зат оештырмыйча эшкуарлык эшчәнлеген алып баручы затлардан тыш, этил спирты һәм спиртлы азык-төлек булмаган продукцияне ваклап саткан өчен җаваплылыгын билгеләү тәкъдим ителә.

Александр Чубаров закон проектына Дәүләт Думасы Закон чыгаручылар Советы һәм Дәүләт Советы Хокук идарәсе тарафыннан уңай бәяләмә алынуын хәбәр итте. РФ ФС Дәүләт Думасы депутаты Айрат Фәрраховка Россия парламентының түбән палатасында закон чыгару инициативасын тәкъдим итү йөкләнде.

Моннан тыш, парламентарийлар «ТР дәүләт органнары һәм ТР җирле үзидарә органнары эшчәнлеге турындагы мәгълүматны алу мөмкинлеген тәэмин итү турында» ТР Законына үзгәрешләр кертү хакында»ТР законы проектын кабул итте. Документны ТР дәүләт идарәсен  цифрлы үстерү, мәгълүмат технологияләре һәм элемтә министры Айрат Хәйруллин тәкъдим итте.

Министр хәбәр иткәнчә, ТР дәүләт хакимияте органнарының бердәм порталы хәзерге вакытта 1 меңгә якын рәсми сайтны берләштерә. 2021 елда аларга мөрәҗәгать итү 80 млн. нан артык булган.

Закон проекты ТР Дәүләт органнары, җирле үзидарә органнары эшчәнлегенең ачыклыгын арттыруга юнәлдерелгән, закон гамәленә шулай ук үз карамагындагы оешмалар да эләгә. Документ гражданнарның дәүләт органнары һәм оешмалары эшчәнлеге турында дөрес мәгълүмат алу шартларын яхшыртуны күздә тота. Хәзерге вакытта 5500 дән артык оешма үзләренең социаль медиа битләрен булдырганнар.

Шулай ук утырышта беренче укылышта һәм тулаем алганда, Татарстанда аттракционнарның техник торышы һәм эксплуатациясе өлкәсендә төбәк дәүләт контролен гамәлгә ашыру турында закон проекты кабул ителде.