Дмитрий Чернышенко һәм Рөстәм Миңнеханов Digital Innopolis Days 2022 форумының пленар утырышында чыгыш ясадылар

Бүген Иннополиста «Digital Innopolis Days 2022» мәгариф, бизнес һәм дәүләт идарәсендә цифрлы трансформация турында форум ачылды. Форумның пленар утырышын Россия Хөкүмәте Рәисе урынбасары Дмитрий Чернышенко үткәрде.

Пленар утырышның төп темасы - «Мәгариф, фән һәм индустрия интеграциясе: Россиянең кадрлар һәм фәнни-тикшеренү потенциалын үстерү өчен импульс».

Чарада Татарстан Президенты Рөстәм Миңнеханов, Россия Фән һәм югары белем министры урынбасары Дарья Кирьянова, Россия Цифрлы үсеш, элемтә һәм массакүләм коммуникацияләр министры урынбасары Максим Паршин, Россия Энергетика министры урынбасары Эдуард Шереметцев катнашты.

Digital Innopolis Days – DID – мәгариф, бизнес һәм дәүләт идарәсендә цифрлы трансформация турында форум. Форум мәйданчыкларында Россиянең әйдәп баручы югары уку йортлары ректорлары һәм проректорлары тәҗрибә уртаклашалар, ясалма интеллект, цифрлы университетлар өлкәсендә әйдәп баручы дөньякүләм спикерлар белән аралашалар. DID катнашучылары яңа белем бирү форматлары һәм инновацион фикерләү продуктлары белән танышалар.

Пленар утырышта катнашучылар алдында чыгыш ясап, Татарстан Республикасы Президенты Рөстәм Миңнеханов ассызыклаганча, әлеге форумның төп темаларының берсе – Россия төбәкләрен цифрлы трансформацияләү. «Татарстан, цифрлы трансформация дәрәҗәсе буенча лидер буларак, үз тәҗрибәсе белән уртаклашырга әзер», - диде ул.

Квалификацияле кадрлар әзерләү компанияләрнең ихтыяҗларын исәпкә алмыйча мөмкин түгел, дип белдерде Татарстан Президенты. Бу алымга башлангыч «Цифрлы икътисад өчен кадрлар» федераль проекты кысаларында салынды, ул үзенең нәтиҗәлелеген исбатлады.

Рөстәм Миңнеханов искәрткәнчә, болар барысы да Иннополис Университетының Алдынгы инженерлык мәктәбенең киж колачлы федераль программасын гамәлгә ашыру кысаларында гамәлгә ашыру өчен нигез булды.

Ул белдергәнчә, дәүләт ярдәме программалары илнең кадрлар потенциалын үстерүгә зур өлеш кертә.

Россия вице-премьеры Дмитрий Чернышенко, форумда чыгыш ясап, хәзерге вакытта Россиягә импортны нәтиҗәле алмаштыру өчен цифрлы күнекмәләре булган югары квалификацияле кадрлар кирәклеген әйтте. Хөкүмәт фәнни продуктларга заказ бирүчеләрне берләштерү эшен башлап җибәрде инде. 216 проект расланган, аларны булдыру, үстерү һәм файдалану өчен 200 меңнән артык яңа белгеч кирәк булачак.

Иннополис Университеты базасында эшләүче таяныч белем бирү үзәге мәгариф һәм индустриаль үзәкләр технологияләрен трансферлауның «бердәм тәрәзә»се булачак. Эш башланганнан бирле анда 34 меңнән артык укытучы таныклык алган. Хәзер без импортны алмаштыру бурычларын гамәлгә ашыру өчен үзәкне «яңадан туплыйбыз». Белем бирү программалары актуальләштереләчәк, хезмәткәрләрнең компетенциясен бәяләү инструментлары һәм аларның һөнәри үсеш матрицалары булдырылачак», - диде Дмитрий Чернышенко.

Форум мәйданчыгында шулай ук Иннополис Университетының фәнни-мәгариф казанышлары һәм 18 индустриаль партнерның технологик проектлары күргәзмәсе оештырылган, алар арасында Касперский, ЯКласс, Глонасс, агарту, GlobalLab, iSpring, CDO Global лабораториясе бар.

Пленар утырыш башланганчы Дмитрий Чернышенко һәм Рөстәм Миңнеханов күргәзмәне – Иннополис Университетының ясалма интеллект буенча тикшеренү үзәге стендын, шулай ук исәпләү техникасы, ноутбуклар, планшетлар җитештерә торган «АйСиЭл Техно" ҖЧҖне карадылар.