Татарстанда 2022 елның 9 аенда берләштерелгән бюджетына керемнәр күләме 362,3 млрд сум тәшкил иткән

2022 елның 9 аенда Татарстан Республикасында республиканың берләштерелгән бюджетына керемнәр күләме 362,3 млрд сум тәшкил итте, шулардан үзенең салым һәм салым булмаган керемнәре – 309,7 млрд сум. Бу хакта бүген Татарстан Республикасы Президенты Рөстәм Миңнеханов 2022 елның 9 аенда Татарстан Республикасы берләштерелгән бюджетын үтәү йомгаклары һәм 2022 елга бурычларга багышланган Татарстан Республикасы финанс, казначылык һәм салым органнарының республика киңәшмәсендә белдерде.

Киңәшмә ТР Хөкүмәте Йортында уза. Агымдагы елның 9 аенда республика салым органнарының эш нәтиҗәләре, 9 айда ТР берләштерелгән бюджеты үтәлеше, Федераль казначылыкның ТР буенча идарәсенең елның 9 аенда башкарган эш нәтиҗәләре кебек мәсьәләләр каралды.

Рөстәм Миңнеханов, киңәшмәне ачып, киләсе елга бюджетның 27 млрд. сумнан артык дефицит белән формалашуын билгеләп үтте (искәртеп узабыз, бюджет ТР Дәүләт Советы тарафыннан 1 нче укылышта кабул ителде).

«Хәзерге геосәяси шартларда безнең предприятиеләр бизнесны үзгәртеп кору буенча катлаулы эш алып бара. Бу, беренче чиратта, продукция белән тәэмин итү чылбырын үзгәртү, импортны алыштыручы җитештерүләрне оештыру», - диде Рөстәм Миңнеханов.

Ул шулай ук салым органнары мәгълүматлары буенча предприятиеләрнең зыяннары күләме 1,5 тапкырдан артып китүен ассызыклады.  

Тармак министрлыкларына бюджетка түләүләрне киметүче һәм кыенлыклар кичерүче предприятиеләр белән баланс комиссияләре үткәрүне дәвам итәргә кирәк, диде Татарстан Республикасы Президенты. Ул җитештерүчеләрнең проблемаларын карау, ярдәм итү мөһимлеген ассызыклады. «Җитештерүчеләрне җыеп кына калмадылар, аларга нинди ярдәм күрсәтә алуыбызны карарга кирәк, – диде Рөстәм Миңнеханов. - Федераль, республика ярдәменең барлык чаралары да җәлеп ителергә тиеш».  

Моннан тыш, Рөстәм Миңнеханов белдергәнчә, бүген салым бурычын киметү буенча системалы эшне дәвам итәргә кирәк. 1 октябрьгә республиканың берләштерелгән бюджетына бурыч 12,5 млрд. сумга җиткән. «Бу безнең бюджет дефициты суммасының яртысы диярлек», - дип чагыштырды Рөстәм Миңнеханов. Узган елның шушы ук чорына карата үсеш - 4,6 млрд.сум (яки 57,9% ка).

Татарстан Президенты тармаклар буенча мәгълүматларны хәбәр итте. Мәсәлән, Төзелеш, архитектура һәм торак-коммуналь хуҗалык министрлыгы карамагындагы предприятиеләр тарафыннан бурычлар шактый арткан - якынча 4 млрд.сум, Сәнәгать һәм сәүдә министрлыгы линиясе буенча предприятиеләрнең бурычлары 2,7 млрд. сум тәшкил иткән, Транспорт һәм юл хуҗалыгы министрлыгы буенча - 850 млн. сум.

Рөстәм Миңнеханов дәүләт контракты кысаларында юнәлдерелгән бюджет акчаларын контрольдә тотуны көчәйтергә, шулай ук бурычлы кешеләр белән баланс комиссияләре эшен муниципалитетлар дәрәҗәсендә үткәрергә кушты. ТР Президенты муниципаль район башлыкларына бу мәсьәләне контрольдә тотарга кушты.