Рөстәм Миңнеханов рәислегендә «Татнефтехиминвест-холдинг» АҖ Директорлар советы берничә инновацион проектны карады

Бүген «Татнефтехиминвест-холдинг» АҖ Директорлар советының чираттагы утырышында кайбер инновацион проектлар каралды. Утырышны Татарстан Республикасы Президенты Рөстәм Миңнеханов үткәрде. Чара Татарстан Республикасы Министрлар Кабинетының утырышлар залында узды. «Татнефтехиминвест-холдинг» АҖ генераль директоры Рафинат Яруллин 9 ай эчендә Татарстанның нефть-газ химиясе комплексы предприятиеләренең эшенә йомгак ясады.

Метаннан биопротеин  ясау терлекчелек үсеше аркасындагы азык протеины җитешмәү мәсьәләсен хәл итәчәк. Бу хакта «Иннопрактика» компаниясе (Мәскәү) башкарма директоры урынбасары Дмитрий Зайцев докладында әйтелде. Җитештерелгән продуктны фармацевтика ихтыяҗлары өчен яраклы итеп яхшыртырга мөмкин булачак. Моның өчен предприятие пилот производствосын эшләтеп җибәрәчәк. 2023-2024 елларда сынау производствосын эшләтеп җибәрү планлаштырыла.

«Мондый азык барлык авыл хуҗалыгы хайваннары, аерым алганда, кошчылык өчен яраклы», - дип билгеләп үтте Татарстан авыл хуҗалыгы һәм азык-төлек министры Марат Җаббаров.

Казанда Оборона министрлыгы һәм «Россия почтасы» өчен илебезнең авыр пилотсыз очкычларын җитештерү эшләре бара. Бу хакта ТР Фәннәр Академиясенең циркуляр икътисад үзәге җитәкчесе урынбасары Василий Шестюк сөйләде. Ул Татарстанда ультра югары молекуляр полиэтилен һәм аның нигезендә җепләр чыгара башларга тәкъдим итте. Алар шулай ук бронежилетлар һәм армия каскалары җитештерү өчен кирәк.

Башкортстан Республикасы нефть химиясе эшкәртү институты генераль директоры урынбасары Илшат Теләшев Ашалчы ятмасының югары үзле нефтьләрен («Татнефть» тарафыннан эшләнә) югары сыйфатлы юл битумнарына эшкәртергә тәкъдим итә. Ул билгеләп үткәнчә, мондый чималдан битум югары ныклык һәм температура үзгәрүгә чыдамлыгы белән аерылып тора. Уфа профессоры Башкортстан тәҗрибәсен китерде.

Рөстәм Миңнеханов бу тәҗрибәне өйрәнергә һәм сынау участогы булдырырга кушты.

Полимер композит җиңнәр җитештерү технологиясен «Пируслайн» ҖЧҖ (Дзержинск) компаниясен гамәлгә куючы Михаил Волков тәкъдим итте. Түбән Новгород предприятиесе «П-Д Татнефть-Алабуга Стекловолокно» компаниясе белән хезмәттәшлек итәргә планлаштыра. Татарстанда җиң өслекләрен җитештерүне локальләштерү суүткәргеч һәм канализация торбаларының тузуын 7-10 ел эчендә 10% ка кадәр киметергә мөмкинлек бирәчәк.

«Эм-Си Баухеми» ҖЧҖнең «Инфраструктура һәм сәнәгать төзелеше» юнәлеше җитәкчесе Евгений Журавлев цементлаштыру алдыннан грунтларны тыгызлау өчен инъекцияләрнең өстенлекләре турында сөйләде. Полимер инъекцияләр фундаментларны тиз арада ныгытырга ярдәм итә.

Рөстәм Миңнеханов юл төзүчеләр, сәнәгать объектлары өчен бу технология белән кызыксынуын белдерде, шулай ук әлеге контекстта Казан Кремлендәге Сөембикә манарасын билгеләп үтте.