Иннополиста «Газпром» ГАҖ баш фәнни үзәге компетенцияләре үзәге – «Газпром ВНИИГАЗ» оештырылачак

Татарстан Республикасы Президенты Рөстәм Миңнеханов рәислегендәге «Иннополис» махсус икътисади зонасының күзәтчелек советы кысаларында «Газпром ВНИИГАЗ» ҖЧҖ «Иннополис» МИЗ партнеры статусын алды. Иннополиста компания Татарстан Республикасының фәнни-җитештерү һәм IT-компанияләре белән хезмәттәшлек итү өчен компетенцияләр үзәге төзергә планлаштыра.

ВНИИГАЗ IT-шәһәрдә җитештерәчәк төп продукт - «Газпром» ГАҖ җитештерү объектларының техник торышы һәм бөтенлеге белән идарә иткәндә карарлар кабул итүгә ярдәм итүче интеллектуаль система. Иннополис Университеты белән берлектә прототип буларак машина өйрәнү һәм ясалма интеллект технологияләрен кулланып, торба үткәргечләренә техник диагностикалау системасы эшләнде.

Мондый система мәгълүматларны автоматик рәвештә тикшерә һәм эшкәртә ала, шулай ук физик-химик модельләштерү нәтиҗәләре нигезендә ВНИИГАЗның уникаль методикасы буенча торба үткәргечендәге җитешсезлекләрнең үсү срогын исәпли ала. Ул инде «Газпром ВНИИГАЗ» ҖЧҖ белгечләре тарафыннан сынап каралган һәм масштабланачак. Аны гамәлгә кертү нәтиҗәсендә диагностик комплексларның мәгълүматларын тану вакыты 100 тапкыр кыскарачак.

«Газпром ВНИИГАЗ» Иннополиста шулай ук алдан модельләштерү һәм робототехника технологияләрен үстерү өлкәсендәге проектлар белән шөгыльләнәчәк.

"Безнең өчен Иннополиска илдәге иң эре ягулык-энергетика комплексы компаниясе үзенең структур бүлекчәсе йөзендә килүе әһәмиятле, – дип билгеләп үтте Татарстан Республикасы Премьер-министры урынбасары Роман Шәйхетдинов. - Без «Газпром» белән инде берничә ел хезмәттәшлек итәбез, ә хәзер компания бездә аерым аерымланган бүлекчә ачачак, ул IT-вуз белән берлектә бөтен компанияләр төркеменең нефть-газ юнәлешендәге яңа продуктлар эшләү белән шөгыльләнәчәк".

"Бүгенге көндә Татарстан Республикасы, ә аерым алганда Иннополис, илебездә ИТ-тармакны үстерү драйверлары булып тора һәм икътисадны цифрлы трансформацияләү буенча федераль программаларны уңышлы гамәлгә ашыра. Безнең өчен бу газ тармагының цифрлы продуктларын булдыруда һәм үстерүдә катнашачак аерым бүлекне оештыру өчен мәйдан сайлауда төп сәбәп булды. Иннополис резидентлары һәм компанияләре белән тыгыз хезмәттәшлек иң кыска вакытта һәм югары дәрәҗәдә актуаль тармак бурычларын нәтиҗәле үтәргә мөмкинлек бирер, дип ышанам" – дип ассызыклады «Газпром ВНИИГАЗ» ҖЧҖ генераль директоры Максим Недзвецкий.