Рөстәм Миңнеханов «Яшь профессионаллар - 2022» X илкүләм чемпионаты финалында җиңүчеләр һәм призерлар белән очрашты

Бүген Татарстан Республикасы Президенты Рөстәм Миңнеханов «Яшь профессионаллар - 2022» X илкүләм чемпионаты финалында җиңүчеләр һәм призерлар белән очрашты. Очрашу Казан Кремленең Вәкиллек корпусында узды, анда шулай ук «Һөнәри осталыкны үстерү агентлыгы» (Ворлдскиллс Россия) КАБО генераль директоры Роберт Уразов, Татарстан Республикасы Министрлар Кабинеты Аппараты җитәкчесе – Татарстан Республикасы Премьер-министры урынбасары Шамил Гаффаров катнашты.

«Яшь профессионаллар» илкүләм чемпионаты финалы һәм Евразия чемпионаты җиңүчеләрен һәм призерларын сәламләп, Рөстәм Миңнеханов Татарстанның сентябрьдә узган Россия һәм халыкара дәрәҗәдәге һөнәри осталык ярышларында кабат югары нәтиҗәләр күрсәтүен билгеләп үтте.

Ул ассызыклаганча, республика тагын бер тапкыр лидерлык позициясен раслады, илкүләм чемпионат һәм чемпионат циклы нәтиҗәләре буенча төбәкләр рейтингында 2 нче урынны алды. Чарада катнашучыларга ярышларның төп нәтиҗәләре турында ролик күрсәтелде.

2022 елгы илкүләм чемпионат «Яшь профессионаллар» хәрәкәтендә 10 нчысы булды. Чемпионат циклында Татарстан 111 медаль, профессиональлек өчен 55 медальон яулады.

Финал белән беррәттән, бүленгән форматта Евразия чемпионаты узды, анда барлык игълан ителгән конкурсантлар да беренче урыннарны алды. «Сезнең һәр медаль – Татарстан уңышы. Әлбәттә, мондый нәтиҗәгә системалы эштән, тулысынча җәлеп итүдән, чемпионат циклында күп санлы күнегүләрдән башка ирешеп булмый. Чемпионнарны һәм призерларны югары нәтиҗәләре белән котлыйм. Аерым рәхмәт сүзләре экспертларга, тренерларга һәм педагогларга – күрсәтелгән ярдәм һәм эш өчен, шулай ук чемпионатта югары нәтиҗәләр бирә торган уку йортлары җитәкчеләренә», - диде Рөстәм Миңнеханов.

Хәрәкәт 10 ел дәвамында Татарстан һөнәри белем бирү системасында кадрлар әзерләүнең нәтиҗәле технологияләрен гамәлгә кертүнең нәтиҗәле инструменты булып тора.

«Һөнәри осталык буенча чемпионатта сезнең җиңү – булачак эш бирүчегә мөрәҗәгать иткәндә өстәмә плюс, ә югары нәтиҗәләрисә – һичшиксез өстенлек. Республика алга таба да «Яшь профессионаллар» чемпионаты хәрәкәтенә ярдәм итәчәк, аның югары стандартларын белем бирү практикасына кертәчәк. Бүген махсус хәрби операция үткәрү шартларында һәркемнең үз эшенә җаваплы каравы, гомуми нәтиҗәне – димәк, Россия җиңүен тәэмин итүе бик мөһим! Бары тик бергәләп без илебез алдында торган яңа проблемаларны җиңә алабыз!» ,- диде Рөстәм Миңнеханов.

Очрашу кысаларында дәүләт бүләкләре - Татарстан Республикасы Президенты Рәхмәтләре, Татарстан Республикасы Министрлар Кабинеты Рәхмәт хатлары тапшырылды.

Белешмә өчен:

«Яшь профессионаллар» X илкүләм чемпионаты финалы 2022 елның 8-12 сентябрендә Саранскта (Мордовия Республикасы) дистанцион форматта узды. Финал ярышлары 100 компетенция буенча узды (66 «Ворлдскиллс» компетенциясе һәм 34 «Ворлдскиллс Юниор» компетенциясе), шуларның 30сы –  көндезге форматта, 70е – дистанцион форматта региональ мәгариф оешмалары базаларында.

Татарстан Республикасын 73 компетенциядә 96 конкурсант һәм 74 эксперт тәкъдим итте (42 «Ворлдскиллс» компетенциясе һәм 31 «Ворлдскиллс юниор» компетенциясе). Финал ярышларында 14 компетенция буенча 25 конкурсант һәм 15 эксперт катнашты.

12 сентябрьдә «Яшь профессионаллар– 2022» Х илкүләм чемпионаты финалының ябылу тантанасы узды. Татарстан Республикасы Россия Федерациясе төбәкләренең гомуми медаль зачетында икенче урынны алды. Гомумкоманда рейтингында беренче урынны Мәскәү командасы, өченче урынны Санкт-Петербург командасы алды.