Татарстан Республикасы Президенты Рөстәм Миңнеханов FESCO төркеменең Директорлар советы рәисе Андрей Северилов белән очрашты

Бүген Татарстан Республикасы Президенты Рөстәм Миңнеханов FESCO («Fesco», «Группа») транспорт төркеме Директорлар советы рәисе Андрей Северилов белән очрашты. Очрашу Татарстан Республикасы Хөкүмәте Йортында узды.

Рөстәм Миңнеханов, кунакларны сәламләп, Владивосток портына бару һәм FESCO транспорт төркеме эшен үз күзләре белән күрү мөмкинлеге өчен рәхмәт белдерде. «Сез җитди потенциалга, бердәм командага ия, – диде Рөстәм Миңнеханов. – Хәзерге заман вакыйгаларын исәпкә алып, транспорт-логистика эшчәнлеге, контейнерлар ташу алгы планга чыга. Без хезмәттәшлек итәргә телибез, чөнки Татарстан – иң эре сәнәгать төбәкләренең берсе».

Рөстәм Миңнеханов шулай ук Свияжск төбәкара мультимодаль логистика үзәгенең FESCO транспорт төркеме өчен кызыклы мәйданчык булуын билгеләп үтте.

Татарстан Президенты искә төшергәнчә, бүген Татарстан, Россия төбәге буларак, Казахстан, Үзбәкстан, Төркмәнстан, шулай ук Иран һәм Төркия белән актив эшли. «Без үзара файдалы була алабыз», – диде ул, FESCO вәкилләренә мөрәҗәгать итеп.

Яклар төркемнең яңа логистик продуктларын Татарстанның тышкы сәүдә үсеше векторлары белән синхронлаштыру мөмкинлеген карарга килештеләр, алар Кытай һәм Азиянең башка илләре белән икътисадый хезмәттәшлеккә юнәлдерелгән.

Моннан тыш, Андрей Северилов һәм Рөстәм Миңнеханов төбәкнең төбәкара мультимодаль логистика үзәкләре базасында төркемнең интермодаль сервисларын үстерү перспективалары турында фикер алыштылар.

FESCO Директорлар советы рәисе Андрей Северилов 2022 елның сентябрендә старт алган FESCO Kazan Shuttle даими сервисы кысаларында икенче контейнер поезды җибәрелүе турында сөйләде.

«Без Татарстан Хөкүмәтенең FESCO транспорт төркеменә Татарстанда күрсәткән ярдәмен һәрьяклап бәялибез. Үз ягыбыздан, без, Россиядә контейнерлар ташу өлкәсендә лидерларның берсе буларак, Татарстан бизнесына республиканың транспорт мөмкинлекләрен тагын да күбрәк заманча логистик хәл ителешләр тәкъдим итү өчен бөтен уникаль тәҗрибәне һәм компетенцияләрне җәлеп итәргә әзер», - диде Андрей Северилов.

Очрашуда Татарстан министрлыклары һәм ведомстволары вәкилләре, Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Олег Коробченко, Татарстан Республикасы транспорт һәм юллар хуҗалыгы министры Фәрит Хәнифов, Татарстан Республикасы Президенты каршындагы Эшкуарлар хокукларын яклау буенча вәкаләтле вәкил Фәрит Габделганиев та катнашты.

Белешмә өчен:

FESCO – Россиядә порт, тимер юл һәм интеграцияләнгән логистика бизнесы өлкәсендә активлары булган иң эре хосусый транспорт-логистика компанияләренең берсе. Төркемнең күпчелек өлеше Россиянең Ерак Көнчыгышында урнашкан, бу Россия белән Азия илләре арасында динамик рәвештә үсә торган сәүдә операцияләрендә катнашудан өстәмә өстенлекләр алырга мөмкинлек бирә.

FESCO төркеменә ел саен 5 млн. тонна генераль йөк һәм нефть продуктлары, 150 мең берәмлек автомобиль һәм тәгәрмәч техникасы һәм 670 мең TEU контейнер йөге сыйдырышлы «Владивосток Диңгез сәүдә порты» ГАҖ ия.

FESCO 10 мең берәмлек күчмә составтан файдалана. Төркем белән идарә итүдә 110,000 артык TEU бар.

FESCO флотында 22 транспорт корабы бар, алар күбесенчә үз диңгез линияләрендә йөриләр.