Татарстан Президенты Роспотребнадзор хезмәткәрләренә: Сезнең кулларда милләт сәламәтлеге һәм бөтен дәүләт иминлеге

Бүген Татарстан Республикасы Президенты Рөстәм Миңнеханов Россия санитар-эпидемиология хезмәте оешуга 100 ел тулуга багышланган тантаналы чарада катнашты. Чара башланыр алдыннан Рөстәм Миңнеханов Роспотребнадзорның ТР буенча идарәсе ихтыяҗлары өчен ун «ЛАДА» хезмәт автомобиле ачкычларын тапшырды. «Пандемиянең кырыс шартларында эпидемиягә каршы, профилактик һәм карантин чараларының оперативлыгы һәм вакытында уздырылуы аеруча актуаль булмады. Бу автомобильләр Роспотребнадзор хезмәткәрләренең, шул исәптән республиканың муниципаль берәмлекләрендәге территориаль бүлекләрнең көндәлек эше өчен кулланылачак», - дип билгеләп үтте ул тантанада.

Россия дәүләт санитария-эпидемиология хезмәте оешуга 100 ел тулу уңаеннан Роспотребнадзор хезмәткәрләренә котлау сүзләре белән мөрәҗәгать итеп, Татарстан Республикасы Президенты ассызыклаганча, гасыр дәвамында илебезнең санитария хезмәтләре халыкның ышанычлы гигиена һәм санитария иминлеген тәэмин итә, катлаулы һөнәри һәм оештыру бурычларын хәл итә: «Бүген сезнең кулларда милләт сәламәтлеге, димәкки, бөтен дәүләт иминлеге. Юбилей алдыннан сезнең эшчәнлегегезне Россия Федерациясе Президенты Владимир Владимирович Путин югары бәяләде, һәм бу күп нәрсә турында сөйли. Бер генә авыру пандемиясе кешеләр өчен никадәр куркыныч һәм икътисад өчен никадәр зарарлы булырга мөмкин, без яңа коронавирус инфекциясе мисалында моңа ышандык. Ул шулай ук сезнең хезмәтегезнең никадәр мөһим булуын тагын бер кабат күрергә ярдәм итте».

Кулланучылар хокукларын яклау һәм кеше иминлеге өлкәсендә күзәтчелек федераль хезмәте һәм Татарстан Хөкүмәтенең соңгы еллардагы уртак эшенә йомгак ясап, Рөстәм Миңнеханов республика сәламәтлек саклау системасының яңа чакыруларга һәм шартларга яраклаштыра алуны, мәкерле вирус таралуга уңышлы каршы торуны, тотрыклы эпидемиологик ситуациягә ирешүне һәм икътисадның төп тармакларының өзлексез эшләвен тәэмин итә алуын билгеләп үтте. "Йогышлы авыруларны профилактикалаудан тыш, сезнең эшегездә эчәргә яраклы су, атмосфера һавасы, азык-төлек продукциясе сыйфатын, предприятиеләрдәге хезмәткәрләрнең эш шартларын, шулай ук балаларыбызны тәрбияләү һәм укыту шартларын даими контрольдә тоту мөһим роль уйный», - диде ул һәм чыгышында һәм күзәтчелек хезмәтенең данлы традицияләренә нигез салган һәм бүген яшь коллегалары белән үз белемнәре һәм тәҗрибәләре белән уртаклашкан ведомство ветераннарына рәхмәт белдерде: «Ышанам ки, Роспотребнадзор хезмәткәрләре, алга таба да куркыныч авыруларга ныклы һәм ышанычлы «санитар» каршы торуны тәэмин итеп, безнең гражданнарның сәламәтлеген һәм тормышын саклау буенча куелган бурычларны уңышлы үтәячәкләр һәм республиканы төрле яклап үсүенә зур өлеш кертәрләр».

Тантана ахырында Татарстан Республикасы Президенты Рөстәм Миңнеханов Роспотребнадзорның Татарстан Республикасы буенча идарәсенең алдынгы хезмәткәрләренә дәүләт бүләкләре тапшырды.