Татарстан Президенты һәм Россия Табигый байлыклар һәм экология министры республикада «Экология» илкүләм проектын гамәлгә ашыру турында фикер алыштылар

Бүген Татарстан Республикасы Президенты Рөстәм Миңнеханов Россия Федерациясе Табигый байлыклар һәм экология министры Александр Козлов белән очрашты.

Очрашу Татарстан Республикасы Министрлар Кабинеты бинасында узды, анда шулай ук Урман хуҗалыгы федераль агентлыгы (Рослесхоз) җитәкчесе Иван Советников һәм Россия Федерациясе Табигать һәм Татарстан Республикасы министрлыкларыннан башка рәсми затлар катнашты.

Очрашу барышында Татарстанда «Экология» илкүләм проекты кысаларында тормышка ашырыла торган «Уникаль су объектларын саклау» һәм «Иделне савыктыру» федераль проектлары мәсьәләләре тикшерелде. Шулай ук Рөстәм Миңнеханов һәм Александр Козлов су объектларының ярларын ныгыту, Татарстан Республикасы елгалары буенда су саклаучы урманнар утырту һәм башка актуаль мәсьәләләр буенча фикер алыштылар.