Рөстәм Миңнеханов «Добрая Казань» коворкинг пространствосын карады

Бүген Татарстан Республикасы Президенты Рөстәм Миңнеханов «Добрая Казань» коворкингында (Сеченов ур., 5) булды.

Чакыру үзәге һәм конференцияләр залы белән ремонтланган бина 100дән артык хәйрия җәмгыяте вәкилләрен берләштерә. Исегезгә төшерәбез, «Добрая Казань» КАБОсына Сеченов урамындагы торак йортның 1 катында 500 кв метрдан артык мәйданлы иркен бүлмә бирү турындагы карар 2021 елның октябрендә кабул ителгән. Биредә капиталь ремонт ясалган, акчалар муниципаль бюджеттан бүлеп бирелгән. Элек оешма Профсоюзлар урамында урнашкан иде, семинарлар һәм башка хәйрия оешмалары вәкилләре белән очрашулар үткәрү мөмкинлеге юк иде.

Рөстәм Миңнеханов һәм Казан мэры Илсур Метшин кабинетларны, классларны, холлны карап чыктылар, аларның уңайлылыгын һәм җиһазланышын бәяләделәр. Бүген «Добрая Казань» коворкинг базасында мастер-класслар, семинарлар, волонтерларны укыту һәм башка чаралар үткәрергә мөмкин. Шулай ук көн саен коворкингта мөмкинлекләре чикле балаларның әниләре эшли алачак.

Рөстәм Миңнеханов керү төркемен, якындагы территорияне һәм сәламәтлек мөмкинлекләре чикләнгән балалар өчен мәйданчыкларны карады.

Кунаклар өчен шулай ук «Добрая Казань» КАБО презентациясен үткәрделәр.

Холлда Татарстан Президенты Казанның хәйрия фондлары вәкилләре белән аралашты. «Добрая Казань» коворкингында «Архидети» АКО, DonorSearch хәрәкәте, «Ангел Вера» проекты (паллиатив ярдәм), психологик ярдәм кабинеты, диабет белән авыручыларга ярдәм фонды һәм башкалар урнашкан.

Бүген коворкинг базасында анимация буенча дәресләр, ишарәләр теле буенча мастер-класс, нейрокоррекция буенча дәресләр үткәрелә.

Рөстәм Миңнеханов шулай ук «Добрая Казань» КАБО директоры Татьяна Мерзляковага коляскадагы инвалидларны йөртү өчен Lada Largus автомобиленә сертификат тапшырды.

Чарада ТР Президенты Администрациясе Җитәкчесе Әсгать Сәфәров, ТР хезмәт, халыкны эш белән тәэмин итү һәм социаль яклау министры Эльмира Зарипова һәм башкалар катнашты.