Рөстәм Миңнеханов Алабуга муниципаль районында яңа футбол манежы ачты

Бүген Татарстан Республикасы Президенты Рөстәм Миңнеханов Алабуга муниципаль районында яңа футбол манежы ачты.

Ябык футбол манежы «Спорт – тормыш нормасы» илкүләм проектының «Демография» федераль проекты һәм «Аз чыгымлы спорт корылмаларын төзү һәм УСП» республика программасы кысаларында төзелгән.

Каркас-тент өслекле һәм 20-40 м зурлыктагы футбол аланы булган объект административ һәм уен зонасын үз эченә ала. Административ блокта 12 кеше өчен 2 чишенү бүлмәсе, спорт җиһазлары өчен инвентарь бүлмәсе, тренер өчен бүлмә, процедура пункты булган башлангыч медицина ярдәме күрсәтү бүлмәсе, индивидуаль җылылык пункты урнашкан.

Турыдан-туры манеж ясалма газон белән тент түбәсе рәвешендә корылган.

Спорт объектын ачуда чыгыш ясап, Рөстәм Миңнеханов барысын да бу вакыйга һәм 1 сентябрь – Белем көне белән котлады. Ул билгеләп үткәнчә, безнең климат зонасында футбол елның җылы вакытында гына уйнарга мөмкин, һәм бу, әлбәттә, зур җитешсезлек. Рөстәм Миңнеханов сүзләренчә, башка илләр тәҗрибәсен өйрәнү өчен Татарстан делегациясе хәтта Исландиягә дә очты – мондый кечкенә илнең югары дәрәҗәдә футбол уйнавын аңлау өчен. Нәтиҗәдә ябык спорт ареналарын төзү турында карар кабул ителде. Рөстәм Миңнеханов сүзләренчә, башта республикада зур манежлар төзегәннәр. Ә хәзер ел саен 5-6 спорт манежы тапшырыла.

Рөстәм Миңнеханов яшь спортчыларга уңышлар һәм яңа җиңүләр теләде.

Алабуга районында спорт манежын ачу тантанасында ТР спорт министры Владимир Леонов, Алабуга муниципаль районы башлыгы Рөстәм Нуриев катнашты.

Белешмә өчен:

Татарстанда универсаль спорт мәйданчыкларын төзү буенча республика программасы 2013 елдан гамәлгә ашырыла. Быел тагын 5 манеж төзелә: Буада, Биектау авылында, Мамадышта, Минзәлә һәм Нурлатта.