Рөстәм Миңнеханов Казанда «Мөхәммәдия» мәдрәсәсе биналары комплексында булды

Бүген Татарстан Президенты Рөстәм Миңнеханов, РФ Төзелеш һәм ТКХ министры Ирек Фәйзуллин, Татарстанның Дәүләт Киңәшчесе Минтимер Шәймиев, Казан мэры Илсур Метшин Казанда «Мөхәммәдия» мәдрәсәсенең биналар комплексында булдылар.

«Мөхәммәдия» мәдрәсәсенә 1882 елда Иске Татар бистәсенең бишенче Җәмигъ мәчете мәхәлләсендә нигез салына. Аны тәмамлаучылар арасында татар мәдәнияте эшлеклеләре бик күп: драматург Кәрим Тинчурин, рәссам Бакый Урманче, язучылар Фатих Әмирхан, Мәҗит Гафури, композитор Салих Сәйдәш һәм башкалар. 1917 елдан соң уку йорты ябыла. Мәдрәсә тарихында яңа этап 1993 нче елда башлана, тарихи бина мөселманнарга кире кайта һәм укытулар торгызыла. Бүген «Мөхәммәдия» – Россиядә мондый төрдәге иң танылган мөселман мәгариф учреждениеләренең берсе.

2021 елда мәдрәсәнең уку корпусы реставрацияләнде һәм өстәмә объектлар - тулай торак һәм административ корпус төзелешенә кереште. Рөстәм Миңнеханов яңа биналарны карап чыкты һәм студентларның һәм укытучыларның социаль-көнкүреш шартлары белән танышты.

«Мөхәммәдия» мәдрәсәсенең тулай торагы 54 кешегә исәпләнгән. Бинада 17 торак бүлмә, гражданнарның аз хәрәкәт итүче төркемнәре өчен 3 бүлмә, тренажерлар залы, үзлегеңнән әзерлек өчен 2 сыйныф һәм башка техник ярдәмче бүлмәләр каралган.

Мәдрәсәнең административ корпусында уку сыйныфлары, ашау залы, директор кабинетлары, бухгалтерия, кадрлар бүлеге, архив бүлмәсе һәм конференц-зал урнашкан. Административ корпус һәм тулай торак җир өсте күчеше белән тоташтырылган.

ТР Президентына мәдрәсәнең яңа биналарын файдалануга тапшыру уку биналарының мәйданын һәм укучылар санын 1150гә кадәр арттырырга мөмкинлек бирәчәк, дип хәбәр иттеләр.