Рөстәм Миңнеханов Казан Глобаль яшьләр саммиты утырышында: Теләсә кайсы җәмгыятьнең бурычы - яшьләргә потенциалларын гамәлгә ашыру өчен мөмкинлекләр бирү

Бүген Татарстан Республикасы Президенты Рөстәм Миңнеханов «Глобаль көн тәртибендә яшьләр» Казан Глобаль яшьләр саммитының пленар утырышында чыгыш ясады.

Шуны искәртик: саммит бүген Казан Ратушасында уза. Россия Федерациясе Президенты Владимир Путин кунакларга һәм яшьләр саммитында катнашучыларга сәламләү сүзләрен юллады.

Сәламләү текстын Рөстәм Миңнеханов укыды.

Саммитта катнашучылар алдында чыгыш ясаганда, Рөстәм Миңнеханов искә төшергәнчә, быел Казан шулай ук Ислам Хезмәттәшлеге Оешмасының Яшьләр башкаласы булып тора.

«Казанны яшьләр башкаласы дип игълан итү турындагы карарны без Россия Федерациясе һәм Татарстан Республикасының яшьләр сәясәте өлкәсендәге казанышларын һәм уңышларын, республикабызның Ислам хезмәттәшлеге оешмасы белән күпьеллык ныклы элемтәләрен тану билгесе буларак карыйбыз, - диде Рөстәм Миңнеханов. - Мондый статус беренче тапкыр ИХО күзәтүче иленә бирелә. Бу статус быел без истәлекле датаны – Идел буе Болгарстаны тарафыннан Ислам динен кабул итүгә 1100 ел тулуны билгеләп үтүгә бәйле рәвештә аеруча әһәмияткә ия».

Рөстәм Миңнеханов ассызыклаганча, Россия Президенты Владимир Путин карары белән юбилей дәүләт дәрәҗәсендә бәйрәм ителә. «922 елда безнең ата-бабаларыбызның Ислам динен кабул итүе безнең дәүләт үсешендә, илнең алдынгы диннәренең берсе буларак, Ислам формалашуда зур роль уйнады. Без мөселман дөньясы һәм Ислам хезмәттәшлеге оешмасы белән хезмәттәшлеккә аерым игътибар бирәбез».

Рөстәм Миңнеханов искә төшергәнчә, 2003 елда Малайзиядә Россия Федерациясе Президенты Владимир Владимирович Путин безнең илнең ИХОга күзәтүче буларак керергә ниятләве турында белдерде һәм «Россиядә яшәүче 20 млн. мөселман үзләрен мөселман дөньясының бер өлеше итеп тоя ала»,  дип билгеләп үтте.

«Татарстан Россиянең әлеге абруйлы халыкара оешма белән элемтәләрен үстерүгә керткән өлеше белән горурлана, - диде ул. - Бу безнең өчен бик мөһим. - Безнең ислам хезмәттәшлеге оешмасының үзәк аппараты белән дә, аның аерым структуралары белән дә даими диалог җайга салынган. Без ИХО бүлекчәләре, шул исәптән Ислам үсеш банкы, ИХО яшьләр форумы, «ИРСИКА» Ислам тарихы, сәнгате һәм мәдәнияте фәнни-тикшеренү үзәге, мәгариф, фән һәм мәдәният мәсьәләләре буенча Ислам оешмасы (ИССКО) һ. б.лар белән мөнәсәбәтләрне хуплыйбыз.

Моннан тыш, ИХО ярдәме белән ел саен «Россия – Ислам дөньясы: KazanSummit» халыкара икътисадый саммиты уза. «Бу – «Россия – Ислам дөньясы» стратегик караш төркеменең нәтиҗәле икътисадый инструменты, аны мин Россия Федерациясе Президенты В.В. Путин кушуы буенча җитәклим», - дип искәртте Рөстәм Миңнеханов.

Казан Глобаль яшьләр саммитының көн тәртибендә яшьләр миграциясе, яшьләр арасында цифрлаштыру, яшьләр эшкуарлыгы, мәдәниятара диалог кебек мөһим темалар тора. Чара кысаларында шулай ук яшь дипломатларның Глобаль форумы да уза, анда халыкара сәясәтнең иң актуаль темалары тикшерелә.

«Бүгенге пленар утырышның темасы «Глобаль көн тәртибендә яшьләр». Дөнья тотрыксызлык чорына кергән шартларда бу тема аеруча актуальләшә бара. Яшьләр үзләре яшәгән җәмгыятьләрдән ешрак гаделрәк, тигез хокуклы һәм прогрессив мөмкинлекләр таләп итә. Яшьләрнең законлы ихтыяҗларын канәгатьләндерү зарурлыгы, аның проблемаларын хәл итүдә ярдәм итү дәүләтләр һәм төбәкләр сәясәтендә мөһим факторга әверелә», - диде Рөстәм Миңнеханов.

Ул шулай ук теләсә кайсы җәмгыятьнең бурычы – яшьләргә аның потенциалын тормышка ашыру өчен мөмкинлекләр бирү, сыйфатлы белем бирү, хезмәт базарларына керү, социаль лифтлар, җәмәгать тормышында актив катнашу мөмкинлеге бирү һәм башка бик күп нәрсәләрне билгеләп үтте.

«Без яшьләрнең халыкара коммуникацияләренең темпы һәм роле никадәр тиз артуын күрәбез. Быелгы саммит – моның тагын бер дәлиле. Яшьләрнең бүгенге буыны дәүләтләрнең халыкара аренадагы сәясәтен билгеләячәк вакыт җитәчәк. Дөнья төрле тетрәнүләр, энергиялелек, яшьләрнең инициативалы булуы, аның кыенлыкларны җиңеп чыгу сәләте, глобаль процессларда символик урын түгел, аңа лаеклы урын тәэмин итәргә тиеш. Россия мисалында без яшьләрнең мәдәниятләрнең күп төрлелеге, милләтара татулык һәм диниара багланышлар, үзара файдалы халыкара хезмәттәшлек өчен чыгыш ясавын күрәбез», - дип белдерде Татарстан Президенты.

Ул билгеләп үткәнчә, бу контекстта Татарстан Россиянең иң тотрыклы төбәкләренең берсе булды һәм шулай булып кала да. «Республикада яшьләр белән эшләүгә зур игътибар бирелә. 14 яшьтән алып 35 яшькә кадәр булган яшьләр саны Татарстан халкының гомуми саныннан 28%ын тәшкил итә. Без заманча яшьләр мәдәниятенә кирәкле ярдәм күрсәтергә, яшьләрнең социаль, икътисадый, сәяси активлыгын үстерү буенча иң яхшы тәҗрибәләрне кулланырга тырышабыз», - диде Рөстәм Миңнеханов.

Шулай итеп, бүген Татарстанда яшьләрнең иҗади потенциалын интеграцияләүче берничә эре проект гамәлгә ашырыла. Бу – Татарстан Халыклары ассамблеясы, ИХО кысаларында зур эш алып бара торган «Сәләт» яшьләр хәрәкәте; Бөтендөнья татар яшьләре форумы; Казан талантлар ачык университеты; Яшьләр дипломатиясе академиясе һәм башкалар.

«Сезгә республикабызны якыннанрак белү, яшьләр һәм спорт объектлары белән танышу, экскурсияләр уздыру һәм хәзерге Татарстанның чын яшьләр рухын тою мөмкинлеге тудырылуы куандыра, - диде Рөстәм Миңнеханов, саммитта катнашучыларга мөрәҗәгать итеп. - Саммит нәтиҗәләре буенча яшьләр өчен актуаль мәсьәләләр һәм аларны хәл итүгә карашлар чагылдырылган резолюция кабул итү, Россия Федерациясе һәм Ислам Хезмәттәшлеге Оешмасы илләре арасында яшьләр халыкара багланышларының киләчәк үсешенә нигез салучы комплекслы гамәлләр планын тәкъдим итү планлаштырыла».

Рөстәм Миңнеханов шулай ук, саммит кысаларында конструктив һәм эчтәлекле дискуссияләр уздырылыр, ә әйтелгән идеяләр һәм инициативалар илләр һәм халыклар арасында ышанычны һәм үзара аңлашуны ныгытуга хезмәт итәр, яшьләрнең глобаль аралашуының яңа юнәлешләренә нигез салыныр, дигән ышаныч белдерде.

Белешмә өчен:

2022 елгы Казан Глобаль яшьләр саммитында дөньяның 67 иленнән 300 кеше - Ислам Хезмәттәшлеге Оешмасы илләренең яшьләр эшләре һәм спорт министрлары, ИХО илләренең Гадәттән тыш һәм Тулы вәкаләтле илчеләре, ИХО илләренең Генераль консуллары, яшьләр оешмалары лидерлары, яшьләр сәясәте белән шөгыльләнүче халыкара оешмалар вәкилләре, фикер лидерлары, яшь эшкуарлар һәм фәнни җәмәгатьчелек вәкилләре катнаша.