Рөстәм Миңнеханов «Ак Барс» ХК уенчылары белән 2022/2023 Континенталь хоккей лигасы чемпионаты уеннары алдыннан очрашты

Бүген Татарстан Республикасы Президенты Рөстәм Миңнеханов «Ак Барс» хоккей клубы җитәкчелеге, уенчылары һәм тренерлар штабы белән очрашты.

Очрашуда Татарстан спорт министры Владимир Леонов, «Ак Барс» ХК һәм Татарстан Республикасы Хоккей федерациясе президенты Наил Маһанов, «Ак Барс» ХК баш тренеры Олег Знарок һәм башкалар катнашты.

Очрашу 2022/2023 сезонында Континенталь хоккей лигасы чемпионаты уеннары алдыннан узды.

«Ак Барс»ның баш тренеры Олег Знарок команданың Татарстан Президенты Рөстәм Миңнеханов белән очрашуында КХЛның яңа сезонында хоккей клубы алдында торган максатларны аңлау турында белдерде. «Сезгә игътибарыгыз өчен рәхмәт белдерәсем килә. Бурычлар барысы да ачык. Без «Ак Барс»ның Татарстан өчен әһәмиятен аңлыйбыз. Хәлебездән килгәннең барысын да эшләячәкбез», - диде ул.

«Ак Барс» капитаны Данис Зарипов Татарстан Президенты Рөстәм Миңнехановка Казан клубының КХЛдагы яңа сезон башлануга әзерлеге турында сөйләде. «Гадәттәгечә, коллектив исеменнән командага булган игътибарыгыз өчен рәхмәт сүзләрен җиткерәм. Төп моментларда сез һәрвакыт безнең белән. Егетләр барысы да тулысынча әзер. Өй турниры («ТАНЕКО Кубогы») төп турнир булачак. Анда без киләчәктә нәрсәгә басым ясарга икәнен күрәчәкбез», - диде Данис Зарипов.

Искәртеп узабыз, узган сезон алдыннан Данис Зарипов хоккейчы карьерасын төгәлләячәген белдерде. Тик быел җәй «Ак Барс» капитаны клуб белән яңа контракт төзеде. Бүген ул Татарстан Президентына яңа вәгъдәләр бирмәячәген белдерде. «Бу юлы вәгъдәләр булмаячак. Боздагы эшебез һәм нәтиҗәбез белән исбатлаячакбыз», - дип ассызыклады Данис Зарипов.

Исегезгә төшерәбез, алга таба «Ак Барс» хоккей клубы сезон алды турнирында катнашачак, ул 26 – 29 августта Казанда узачак. Аннан соң команда КХЛның даими чемпионатының яңа сезонында старт ала. Казанлылар беренче матчны 3 сентябрьдә Мәскәүдә җирле «Динамо» белән уйнаячак.

Татарстан Президенты үз чиратында: «Без команда хәйраннары, без патриотлар», - дип белдерде.

Ул шулай ук уенчыларны ышандырды: «Республика, спорт министры һәм башкалар – без барыбыз да сезнең җанатарлар!»