Рөстәм Миңнеханов Яңа Чишмә районында урып-җыю барышы белән танышты һәм яңа мәчеттә булды

Татарстан Республикасы Президенты Рөстәм Миңнеханов Яңа Чишмә районы кырларында урып-җыю эшләренең темпларын бәяләде.

Хуҗалыклар җитәкчеләре белән очрашуда Татарстан Республикасы Президентына урып-җыюның төп күрсәткечләре турында хәбәр иттеләр. 58 мең гектардан уңыш җыеп алырга кирәк булачак, эшкә 69 комбайн җәлеп ителәчәк, шул исәптән читтән дә.

Әңгәмә барышында ТР Президенты терлекчелекне актив үстерү кирәклегенә игътибар итте.

Очрашу «Агрораздолье» ҖЧҖ мәйданчыкларында узды. Рөстәм Миңнехановка SGR 100 ашлык киптерү комплексын күрсәттеләр. Әлеге элеватор җиһазлары бөртеклеләрне һәм майлы культураларның сакланышын тәэмин итү һәм озак сроклы саклау һәм эшкәртү өчен төяп җибәрүне тәэмин итү максатларында ашлыкны урып-җыюдан соң эшкәртү өчен билгеләнгән. Планлы җитештерүчәнлек – 100 тонна.

Сәфәр ахырында Рөстәм Миңнеханов Акъяр авылындагы яңа мәчеттә булды. Төзелеш авыл халкы инициативасы белән гамәлгә ашырылган. Элеккеге авыл хуҗалыгы идарәсе бинасында урнашкан иске мәчет заманча таләпләргә җавап бирми һәм капиталь ремонтка мохтаҗ була. Яңа гыйбадәтханә бинасын төзү 2020 елда башланган. Төп спонсор – ТР Дәүләт Советы депутаты Рифнур Сөләйманов. Мәчет 60 кешене сыйдыра һәм мәхәллә кешеләре өчен ачык инде.