Рөстәм Миңнеханов Казан танк училищесын тәмамлаучыларга дипломнар тапшырды

Бүген танк бүлекчәләренә идарә итү өчен офицерлар әзерли торган Казан югары танк команда училищесында Россия Кораллы Көчләре өчен лейтенантларның 89 нчы тантаналы чыгарылышы булды. Тантанада Татарстан Республикасы Президенты Рөстәм Миңнеханов катнашты.

Хәрби уку йорты территориясенә килүгә Рөстәм Миңнеханов, Казан мэры Илсур Метшин, Үзәк хәрби округка идарә итүче генерал-майор Рөстәм Миңнекаев, Казан танк училищесы башлыгы генерал-майор Кирилл Кулаков һәм башка мәртәбәле кунаклар училищены тәмамлаган герой-танкчылар монументына чәчәкләр салдылар.

Командирларны чыгару тантанасы строй плацында узды. Югары хәрби уку йортын тәмамлау дипломын 111 яшь лейтенант алды, шуларның 12 се югары уку йортын кызыл диплом белән тәмамлаган. Училищены алтын медаль белән тәмамлаган сигез чыгарылыш сыйныф укучысы Рөстәм Миңнеханов кулыннан укулары тәмамлану турында документлар алды.

Татарстан Президенты үз чыгышында ассызыклаганча, бүген Хәрби Көчләр Ватанны саклаучыларның лаеклы плеядасында тора. «Сезгә легендар батырлык һәм намус, бердәмлек һәм патриотизм традицияләрен дәвам итәргә туры киләчәк. Бүгенге офицерлар – җиңүчеләр буыны варислары, Бөек Ватан сугышы геройларының оныклары Ватан өчен аяусыз көрәшәләр, Сириядәге халыкара террорчыларга каршы көрәшәләр, Донбассны неонацистлардан яклыйлар, безнең халык өчен тынычлыкны һәм иминлекне, Россиянең суверен үсешкә хокукын яклыйлар. Бу махсус хәрби операция барышында безнең чыгарылыш сыйныф укучылары батырларча һәм профессиональ хезмәт итә», - диде Рөстәм Миңнеханов.

Аның сүзләренә караганда, училище җитәкчелеге, профессор-укытучылар составы уку процессын нәтиҗәле, кызыклы һәм иҗади итү өчен күп көч куйган. «Сезнең арсеналда – фундаменталь әзерлек, уникаль күнекмәләр һәм осталык. Тиздән сез практик эшчәнлеккә керешәчәксез. Нәкъ менә сезгә Кораллы Көчләрнең иртәгәсе көнен билгеләргә туры киләчәк. Бу – сезнең аңлы сайлавыгыз, чын патриотлар сайлавы. Сез бронетанк гаскәрләренең һәм Казан танк училищесының данлы традицияләрен саклап калуга лаеклы өлеш кертерсез дип ышанам», - дип мөрәҗәгать итте ул чыгарылыш сыйныф укучыларына.

Шулай ук Татарстан Республикасы Президенты командирлар өчен мөһим бурыч – шәхси состав белән эшләү, дип ассызыклады: «Офицер погоннары сезгә кул астындагылар тормышы өчен зур җаваплылык йөкли. Үз солдатларыгызны саклагыз».

Рөстәм Миңнеханов яңа офицерларның ата-аналарын тантаналы көне белән аерым котлады.

«Безнең дошманнарга хәтта бер мизгелгә дә Россия Кораллы Көчләренең куәтенә шикләнмәскә һәм аларның дөньяның теләсә кайсы почмагында ил мәнфәгатьләрен якларга җөрьәт итүләре өчен нәкъ менә сезгә җаваплылык йөкләнә. Намуслылык, батырлык һәрвакыт казанлы офицерларның үзенчәлеге булып тора. Өлкән иптәшләрегезнең йөзенә кызыллык китермәгез һәм училищеның данлы традицияләрен хөрмәтләгез!» - диде үз чиратында Үзәк хәрби округ белән идарә итүче Рөстәм Миңнекаев.

Казан танк училищесы эшләгән елларда аның 76 укучысы Советлар Союзы Герое исеменә лаек булды, 21е – Россия Геройлары, шул исәптән Россия Федерациясе Кораллы Көчләре Генераль Штабы начальнигы армия генералы Валерий Герасимов һәм Үзәк хәрби округ командующие генерал-полковник Александр Лапин. Училищены тәмамлаган барлыгы 250дән артык офицер маршаллар һәм генераллар булган.

Тантана тәмамланганнан соң Рөстәм Миңнеханов «Аврора – Яшь спецназовец» балалар лагерында тәрбияләнүчеләр белән очрашты. Исегезгә төшерәбез, лагерь хәрби хәрәкәтләр ветераннары һәм хезмәт вазыйфаларын башкарганда һәлак булган хәрби хезмәткәрләр балалары өчен булдырылган. Проект Татарстан Президенты химаясе астында тормышка ашырыла.

Шулай ук бүген танк училищесында «Үзәк хәрби округның тарихы һәм сугышчан традицияләре» музее ачылды. Экспозициядә революциягә кадәрге чор, совет чоры хәрбиләренең амуницияләре, кирәк-яраклары, кораллары һәм шәхси әйберләре, шулай ук хәрбиләрнең заманча экипировкасы тәкъдим ителгән.