Алексей Песошин Тәтештә Татарстан буенча ЭЭМ коллегиясе утырышында катнашты

Татарстан Республикасы Премьер-министры Алексей Песошин Тәтешкә эш сәфәре кысаларында Татарстан буенча ЭЭМ коллегиясенең киңәйтелгән утырышында катнашты. Катнашучылар 2022 елның беренче яртыеллыгында эчке эшләр органнарының оператив-хезмәт эшчәнлеге нәтиҗәләре турында фикер алыштылар һәм алдагы чорга бурычлар билгеләделәр. Утырыш Татарстан Республикасы буенча эчке эшләр министры, полиция генерал-лейтенанты Артем Хохорин рәислегендә узды.

Агымдагы елның 6 аенда Татарстан Республикасында 27 меңнән артык җинаять теркәлгән, шул исәптән 9 меңгә якын авыр һәм аеруча авыр җинаять.

Теркәлгән көчләүләр (-69,7%), талаулар (-6,7%), урлаулар (-5,6%), шул исәптән банк счетыннан (-29,9%), кәрәзле элемтә чараларын урлау (-6,2%), ут төртү яки шартлау юлы белән милекне явыз ният белән юк итү яки зарарлау (-21,4%), хулиганлык (-16,7%) очракларының кимүе күзәтелә.

Шәхескә каршы җинаятьләр, шул исәптән үтерү – 96,7%, сәламәтлеккә аңлы рәвештә авыр зыян китерү – 98,3%, көчләү – 100%, шулай ук милеккә каршы көрәш – 98,5%, талау – 93,4%, автомототранспортны урлау – 90,9% югары дәрәҗәдә саклана.

Тикшерелгән урлаулар саны һәм аларны кылган өчен ачыкланган затлар саны буенча ТР буенча Эчке эшләр министрлыгы Идел буе федераль округы субъектлары арасында беренче урында һәм тулаем ил буенча дүртенче урында тора. Банк счетыннан урлаулар – 16,6%ка, IT-технологияләр кулланып кылынган мошенниклык 48,9%ка арткан. Дистанцион рәвештә урлау очраклары һәм аларны башкарган затларны ачыклау шактый арткан: банк счетыннан урлаулар буенча – 14,2%ка, IT-технологияләрне кулланып кылынган мошенниклык буенча – 28,3%ка.

Ел башыннан РФ ҖК 210 статьясы буенча (җинаятьчел бергәлек оештыру) квалификацияләнгән 7 җинаять буенча 4 җинаять эше кузгатылган.

2022 елның июнь аенда «FINIKO» оешкан җинаятьчел төркемен оештыручыларга һәм анда катнашучыларга карата РФ ҖК 210 ст. 1 өлеше буенча җинаять эше кузгатылган, алар 2018 елдан 2022 елга кадәр инвестиция эшчәнлеген гамәлгә ашыру тәкъдиме белән 10 меңнән артык гражданнан законсыз рәвештә 1 млрд. сумнан артык акча алган.

2022 елның 6 аенда оешкан җинаятьчел формированиеләрнең 363 әгъзасы, шулай ук оешкан төркемнәр составында җинаять кылган 96 зат җинаять җаваплылыгына тартылган.

Кабул ителгән комплекслы чаралар нәтиҗәсендә наркоҗинаятьләрне ачу һәм тикшерү буенча эшнең нәтиҗәлелеген сизелерлек арттыруга ирешелгән. Законсыз әйләнештән 243,7 кг төрле наркотик һәм психотроп матдәләр, шул исәптән 223,8 кг синтетик наркотик, 6,2 кг марихуана, 5,6 кг гашиш, 1,3 кг героин алынган. Моннан тыш, ирекле әйләнешкә тыелган 3,5 тоннага якын прекурсор тартып алынган, алар 2 тоннадан да ким булмаган синтетик наркотиклар җитештерү өчен яраклы булырга мөмкин.

Синтетик наркотиклар җитештерү буенча 7 яшерен лаборатория эшчәнлеге туктатылган, шул исәптән 3се – Татарстан Республикасыннан читтә (Мәскәү, Түбән Новгород һәм Ульяновск өлкәләрендә). 2022 елның февралендә Ульяновск өлкәсе территориясендә Татарстан Республикасы буенча Эчке эшләр министрлыгының Җинаятьчеләрне эзләү идарәсе хезмәткәрләре тарафыннан Казанның ике кешесе оештырган нарколаборатория эшчәнлеге туктатылган. Татарстан территориясендә сатарга планлаштырган 120 килограммнан артык мефедрон тартып алынган. Алга таба оператив-эзләү чараларын уздыру барышында Россиянең башка субъектлары территориясендә шундый ук нарколабораторияләрнең эшләве турында мәгълүматлар алынган. Аларның нәтиҗәләре буенча, Татарстан полицейскийлары Мәскәү өлкәсендә нарколабораторияне юк иткән, ике граждан тоткарланган, 21 килограммнан артык мефедрон алынган.

Наркотикларны ташу буенча 36 канал ябылган, бу 2021 елның шул ук чоры белән чагыштырганда 9га күбрәк, шуларның 24се – РФнең башка субъектларына транзит каналлар.

Апрель аенда Чаллыда «Инфинити» автомобиле салонын карау барышында Россия Эчке эшләр министрлыгының Чаллы шәһәре буенча ЮХИДИ инспекторлары 20 килограммнан артык мефедрон табып алган.

Икътисадый һәм коррупцион юнәлештәге җинаятьләр өлкәсендә дә уңай нәтиҗәләр сакланып калган. Әлеге категориядәге җинаять эшләре буенча китерелгән матди зыянның гомуми күләме 34 млрд. 600 млн. сумнан артып киткән, аны каплау 90,1%ка тәэмин ителгән.

Ел башыннан 175 мең литрга якын ялган алкогольле һәм спиртлы продукция легаль булмаган әйләнештән алынган. Бу өлкәдә 56 җинаять ачыкланган. Республика территориясенә контрафакт хәмер китерүнең дүрт зур каналы ябылган, аның легаль булмаган ике җитештерү эшчәнлеге бетерелгән.

Су биоресурсларын саклау буенча эшнең нәтиҗәсе буларак 62 җинаять һәм 166 административ хокук бозу ачыкланган.

Балалар катнашында авариялелек дәрәҗәсе кимү тенденциясе күзәтелә. Республика юлларында балалар катнашында 204 юл-транспорт һәлакате теркәлгән, нәтиҗәдә 5 бала һәлак булган һәм 217 кеше төрле дәрәҗәдәге тән җәрәхәте алган. 2021 елның шул ук чорында 216 юл-транспорт һәлакәте теркәлгән, 10 балигъ булмаган бала үлгән, 226сы яраланган.

2022 елның 6 ае эчендә республика юлларында 1 мең 460 юл-транспорт һәлакате теркәлгән, нәтиҗәдә 127 кеше һәлак булган һәм 1 мең 821 кеше төрле дәрәҗәдәге тән җәрәхәте алган.

Моннан тыш, киңәшмәдә шулай ук Татарстан Эчке эшләр министрлыгының кайбер территориаль бүлекчәләре эше нәтиҗәләре тыңланды һәм алдагы чорга өстенлекле юнәлешләр билгеләнде.