Рөстәм Миңнеханов: Бөтен көч терлекчелекне сыйфатлы азык белән тәэмин итүгә юнәлдерелергә тиеш

Авыл хуҗалыгы формированиеләрен һәм шәхси хуҗалыкларны терлек азыгы белән тәэмин итү өлешендә эшне көчәйтергә кирәк. Бүген бу хакта Татарстан Республикасы Президенты Рөстәм Миңнеханов Татарстан Республикасы Хөкүмәте Йортында узган республика киңәшмәсендә хәбәр итте.

Президент билгеләп үткәнчә, бүген авыл хуҗалыгы өчен бик җаваплы чор. Бөртеклеләрнең киләчәк уңышын формалаштыру эше бара. Шулай ук терлек азыгы әзерләүнең актив фазасы бара: республикада беренче июльгә бер шартлы баш терлеккә 6,9 центнер азык берәмлеге бар. «Бөтен көч терлекчелекне сыйфатлы азыкның кирәкле запасы белән тәэмин итүгә юнәлдерелергә тиеш. Узган ел бик авыр булды, шуңа күрә запасларыбыз юк. Еллык запас кына түгел, өстәмә мөмкинлекләр дә булырга тиеш», – диде Рөстәм Миңнеханов.

Президент район башлыкларына терлек азыгы һәм шәхси хуҗалыклар белән тәэмин итү эшен оештырырга кушты. «Хуҗалыклар өчен терлек азыгы әзерләү – бик мөһим бурыч. Шәхси хуҗалыкларда терлек азыгына бәйле проблемалар булса, терлекләрнең баш санын киметүгә китерергә мөмкин. Республиканың авыл хуҗалыгы һәм азык-төлек министрына бу мәсьәләләргә аерым игътибар бирергә кирәк», – дип ассызыклады Рөстәм Миңнеханов.