«Татарстан Республикасында яшәүче картасы» проекты «Мир» түләү системасы базасында тормышка ашырылачак

Бүген Татарстан Республикасы Президенты Рөстәм Миңнеханов һәм «НСПК – түләү карталарының илкүләм системасы» АҖ генераль директоры Владимир Комлев килешүгә һәм «юл картасына кул куйдылар.

Документ Петербург халыкара икътисадый форумы (ПХИФ-2022) мәйданчыгында имзаланды.

Килешү кысаларында «Татарстан Республикасында яшәүче картасы» проекты гамәлгә ашырылачак.

Татарстан Республикасында яшәүченең «Мир» түләү системасы базасында карталарын бирү быел ук башланачак.

«Апрельдә без Рөстәм Нургалиевич белән картаны технологик сервислар белән тулыландыру вариантлары турында фикер алыштык, һәм Татарстанда проект алдынгы булыр, дип ышанабыз. Картаның бүгенге көндә тиңдәшсез мөмкинлекләреннән берсе – аны тулысынча Дәүләт хезмәт күрсәтүләренең төбәк порталы аша цифрлы чыгару мөмкинлеге. Пластик яки виртуаль карта алу – төбәк халкы сайлавына куела», - дип белдерде «Мир» түләү системасы генераль директоры Владимир Комлев.

Татарстан Республикасында яшәүче картасы социаль әһәмияткә ия булган сервисларны берләштерәчәк, шул исәптән җәмәгать транспортында йөрү, ММИ полисы, СНИЛС һәм башкалар.

«Бүген цифрлаштыру безнең тормышыбызга тулысынча керде. Соңгы унъеллыкта Татарстанда мобиль интернеттан файдаланучылар саны 2,5 тапкыр арткан, ә интернетка тоташтырылган йорт хуҗалыклары саны 1,5 тапкырга арткан. Бу республика халкының төрле төр сервисларга күпләп мөрәҗәгать итүе турында сөйли. «Мондый документның барлыкка килүе, һичшиксез, безнең гражданнар тормышын җиңеләйтүгә юнәлдерелгән цифрлаштыру мәсьәләләрендә тагын бер адым», - диде Татарстан Президенты Рөстәм Миңнеханов.