Рөстәм Миңнеханов Архангельск өлкәсе губернаторы Александр Цыбульский белән очрашты

Бүген Татарстан Республикасы Президенты Рөстәм Миңнеханов Архангельск өлкәсе губернаторы Александр Цыбульский белән очрашты. Очрашу Петербург халыкара икътисади форумы кысаларында узды.

Рөстәм Миңнеханов Татарстан белән хезмәттәшлекне ныгытуга игътибарлары өчен рәхмәт белдерде. Ул билгеләп үткәнчә, Татарстан һәм Архангельск өлкәсенең уртак эш тәҗрибәсе бар. Яклар шулай ук үзара товар әйләнеше мөмкинлекләре һәм күләмнәре турында фикер алыштылар.

Аерым алганда, Татарстан йөк автомобильләре, суднолар төзелеше продукциясе, фармацевтика продукциясе һ. б. белән тәэмин итүне киңәйтү яклы. Мөһим юнәлеш булып цифрлаштыру тора.

Рөстәм Миңнеханов шулай ук белдергәнчә, уртак көч белән регионнарның партнерлык элемтәләрен ныгытырга мөмкин.

Рөстәм Миңнеханов Александр Цыбульскийны 30 августта билгеләп үтелә торган Республика көнен бәйрәм итәргә чакырды.

Татарстан Президенты өлкә җитәкчелегенә татар җәмәгатьчелегенә күрсәткән ярдәм өчен аерым рәхмәт белдерде. Бүген Архангельск өлкәсендә 2,3 меңнән артык татар яши, 2018 елда Архангельскта яңартылган мәчет ачылды.

Архангельск өлкәсе губернаторы шулай ук билгеләп үткәнчә, Рөстәм Миңнеханов белән алдагы очрашудан соң төбәкара багланышлар активлашты.

Ахырда Татарстан белән Архангельск өлкәсе арасында сәүдә-икътисади, фәнни-техник һәм социаль-мәдәни хезмәттәшлек турындагы Килешүне гамәлгә ашыру буенча 2022-2024 елларга Чаралар планы имзаланды. Документка Рөстәм Миңнеханов һәм Александр Цыбульский кул куйдылар.