Рөстәм Миңнеханов Грозный шәһәре мэры Хас-Мөхәммәд Кадыйров белән очрашты

Бүген Татарстан Республикасы Президенты Рөстәм Миңнеханов Грозный шәһәре (Чечен Республикасы) мэры Хас-Мөхәммәд Кадыйров белән очрашты. Очрашу Казан Кремлендә узды.

Грозный делегациясе Казанга Татарстан башкаласы тәҗрибәсен берничә юнәлеш буенча өйрәнү өчен килде: ТКХ системасы эше, торак һәм инфраструктура төзелеше, сәнәгать һәм икътисад үсеше.

Очрашу барышында Рөстәм Миңнеханов һәм Хас-Мөхәммәд Кадыйров хезмәттәшлекнең актуаль мәсьәләләре, шул исәптән сәүдә-икътисадый элемтәләрне үстерү һәм уртак проектлар перспективалары турында фикер алыштылар.

Исегезгә төшерәбез, май аенда Татарстан Республикасы ПрезидентыиЧечен Республикасына эш сәфәренә барган иде. Визит кысаларында төбәкләр арасында сәүдә-икътисадый, фәнни-техник һәм мәдәни хезмәттәшлекне үстерү буенча Чаралар планы имзаланган иде.