Рөстәм Миңнеханов дәүләт бүләкләре лауреатларына: Илнең социаль-икътисадый үсеш темплары, аның куәтен ныгыту нәкъ менә сездән тора

Татарстан Президенты Рөстәм Миңнеханов Казан Кремлендә Россия Федерациясе һәм Татарстан Республикасы дәүләт бүләкләрен тапшырды. Тантана Россия көне алдыннан узды.

Рөстәм Миңнеханов җыелучыларны якынлашып килүче бәйрәм белән котлады. «Без меңьеллык тарихы һәм бай мәдәни мирасы булган илдә яшәвебез һәм эшләвебез белән горурланабыз. Күп буыннарның нәтиҗәле хезмәте, федераль үзәк һәм шәхсән Россия Федерациясе Президенты Владимир Путин ярдәме белән безнең республика – илнең алдынгы, таяныч төбәге», - диде Татарстан Президенты.

Ул билгеләп үткәнчә, Татарстан гражданнарның тормышын яхшырту, көчле Россия төзелеше юнәлешендә эзлекле рәвештә ярдәм итә. «Үз эше белән мавыгучы кешеләрнең, шул исәптән бу залда утыручыларның энергиясе һәм таланты нәтиҗәсендә икътисад, фән, мәгариф, медицина, мәдәният, идарә һәм башка мөһим тармаклардагы иң кыю идеяләр тормышка ашырыла», – дип билгеләп үтте Рөстәм Миңнеханов.

Дәүләт бүләкләре лауреатларына мөрәҗәгать итеп, Татарстан Республикасы Президенты аларның Россиянең социаль-икътисадый үсешенә, аның куәтен ныгытуга керткән зур өлешләрен, илебез алдында торган җитди чакыруларны уңышлы үтәүләрен билгеләп үтте. «Сезнең талантыгыз һәм хезмәт сөючәнлегегез, чыдамлыгыгыз һәм батырлык республикабызны көчле һәм чәчәк атучы итә. Сезнең барыгызны да лаеклы бүләкләр белән котлыйм, үз эшегезгә тугры булуыгыз, шулай ук туган республикабыз һәм Россия Федерациясе үсешенә керткән өлешегез өчен рәхмәт белдерәсем килә», - дип өстәде Рөстәм Миңнеханов.