Рөстәм Миңнеханов Зеленодольск районында эре элеватор төзелешенә старт бирде

Бүген Свияжск төбәкара мультимодаль логистик үзәге территориясендә «Свияжск-Зернопродукт» яңа элеваторы төзелешенә старт бирелде. Чарада Татарстан Республикасы Президенты Рөстәм Миңнеханов катнашты.

Проектның бәясе 2,4 млрд. сум дип бәяләнә. Инвесторы – СММҮ резиденты – «Август-Агро» компаниясе. Элеваторның проект егәрлеге 112,5 мең тонна ашлыкны бер тапкыр саклау тәшкил итәчәк.

Мәйданчыкның урнашуы ашлыкны автомобиль, тимер юл һәм су транспорты белән транспортларга мөмкинлек бирәчәк. Элеваторның үзенчәлеге – сәгатенә 700 тонна йөк төяү. Нәтиҗәдә, «елга-диңгез» судносына һәм тимер юл составына ашлык төяү вакыты 10 сәгатьтән дә артмый.

Рөстәм Миңнеханов Татарстан белән «Август» компаниясенең уңышлы хезмәттәшлеген билгеләп үтте. 2019 елда «Алабуга» МИЗда үсемлекләрне саклау чараларын җитештерү буенча «Август-Алабуга» заводы төзелгән. Моннан тыш, компания республиканың кайбер районнарында заманча авыл хуҗалыгы предприятиеләрен үстерә. «Бүген азык-төлек куркынычсызлыгы мәсьәләсе беренче урында тора. Татарстанда кимендә 4 млн. тонна ашлык җитештерергә кирәк. Заманча сыйфатлы саклаудан һәм эшкәртүдән башка нинди дә булса эшчәнлек алып бару кыен», – диде ул.

Татарстан Президенты ассызыклаганча, республика «Август» агросәнәгать проектларына ярдәм итәчәк. «Без сезнең проектларны гамәлгә ашыруга никадәр җитди каравыгызны күрәбез. Мин сезгә актив эшчәнлегегез һәм ышанычыгыз өчен рәхмәт белдерәсем килә. Элеватор республикабызның иң перспективалы мәйданчыгында төзеләчәк», - дип өстәде Рөстәм Миңнеханов.

Төзелеш берничә этапта узачак. Беренче чират 2023 елның сентябрендә эшли башлаячак, ә проект 2025 елда үз көченә чыгар дип көтелә. Проектны тормышка ашыру 90га якын кешене өстәмә рәвештә эшкә урнаштырырга мөмкинлек бирәчәк.

«Август» компаниясе генераль директоры Александр Усков республика җитәкчелегенә проектны хуплавы өчен рәхмәт белдерде. «Татарстанда Россия өчен бөтенләй уникаль инвестицион климат бар. Биредә тиз арада проектларны тормышка ашырып була. Шуңа күрә инвесторларга биргән мөмкинлекләр өчен зур рәхмәт. Мин ышанам ки, бүген без башлаган проект республика авыл хуҗалыгы үсешенә үз өлешен кертер», - диде Александр Усков.

Шулай ук бүген Рөстәм Миңнеханов Свияжск төбәкара мультимодаль логистик үзәгенең башка резидентлары объектларында булды. Әйтик, KazanExpress Татарстан маркетплейсы яңа фулфилмент-үзәкнең беренче корпусын төзүне тәмамлый. Объектның төзелеш әзерлеге 90%. Компания мәгълүматларына караганда, 2022 елның өченче кварталында төзелеш эшләрен тәмамлау планлаштырыла. Объектның файдалы мәйданы 120 мең кв. метр тәшкил итәчәк. Яңа логоүзәкнең беренче чираты 3 меңнән артык эш урыны бирәчәк. Алга таба 1 млн. квадрат метр файдалы тагын 7 склад корпусы төзү планлаштырыла.

Аннары ТР Президенты «Выбор-Поволжье» ҖЧҖ инвестпроекты белән танышты. Компания тротуар плиткасы җитештерү буенча завод төзүне алып бара. Проектның бәясе 1,8 млрд. сум. Резидент «Выбор» ҖЧҖ компанияләр төркеменә керә, ул Россиядә тротуар плиткасы җитештерү буенча алдынгы позицияләрне били. Объектның төзелеш әзерлеге 75% тәшкил итә, аны тәмамлау буенча 100дән артык эш урыны булдырылачак.

Моннан тыш, Рөстәм Миңнехановка Свияжск төбәкара мультимодаль логистик үзәген үстерү концепциясен тәкъдим иттеләр. Аның гомуми мәйданы 244 га тәшкил итә, шуларның 110 га-индустриаль парк. Логистик үзәк « Зеленодольск » ТИСЭР территориясендә булдырылган, ул сәнәгать һәм үсеш алган транспорт инфраструктурасына ия, шул исәптән т/ю, су һәм автомобиль элемтәсенә ия.

СММҮнең киләчәк үсеше Зеленодольск районы икътисады өчен драйвер булачак, муниципаль берәмлек халкны югары технологияле эш урыннары белән тәэмин итәчәк. Бүген индустриаль паркның нәтиҗәле эшчәнлеге өчен кирәкле инженерлык һәм юл инфраструктурасы объектлары буенча эш алып барыла. Шулай ук сәнәгать парклары резидентларына һәм идарәче компанияләргә ярдәм итүгә юнәлдерелгән чаралар комплексын гамәлгә ашыра.