Рөстәм Миңнеханов Мәскәүдә тарихи мәчеттә булды

Бүген Мәскәүгә эш сәфәре кысаларында Татарстан Республикасы Президенты Рөстәм Миңнеханов тарихи мәчеттә булды – сакланып калган борынгы таш мәчеттә (Зур Татар ур., 28).

Тарихи мәчет бинасы 1991 елда мөселман җәмгыятенә тапшырыла. 1993 елда мәчет озак еллар ябык торганнан соң яңадан ачыла. Соңгы реконструкция 1998 елда үткәрелгән.

Тарихи мәчет биналары комплексы ике корылманы үз эченә ала: мәчет үзе һәм мәдрәсә бинасы. Ике бина да – мәдәни мирас объектлары.

Хәзерге вакытта тарихи мәчетнең йолаларны тулы күләмдә үтәү өчен кирәкле функциональ биналары норматив хәлдә түгел әле. Шуңа бәйле рәвештә мәчетнең тарихи йөзен кайтару, фасадларны, элеккеге планлаштыруны торгызу, төрле хезмәт итү урыннарын аннан чыгару мәсьәләсе карала.

Рөстәм Миңнехановка һәм Россия Федерациясе Мөселманнары диния нәзарәте рәисе, Россия Мөфтиләр шурасы рәисе шәех Равил Гайнетдинга мәчетне реконструкцияләү макетлары һәм проектлары тәкъдим ителде.

Татарстан Президенты реконструкция барышында, биналар комплексы мәчетнең архитектур образына туры килсен өчен, бердәм стильне сакларга тәкъдим итте.

Кунаклар мәчетнең гыйбадәт кылу залының эчке ягын карадылар. Төзелеш үзе 1960 елда мәчет янында төзелгән күп катлы торак йортка якын урнашкан.

Соңыннан намаз укыдылар, шулай ук кунаклар истәлек өченфотога төштеләр.

Рөстәм Миңнеханов, аерым алганда, билгеләп үткәнчә, Мәскәүдә тарихи мәчет бинасы бай тарихка ия, һәм бу тарихны саклап калу мөһим. Рөстәм Миңнеханов сүзләренчә, дин әһелләре һәм белгечләр фикерен исәпкә алып, биналар комплексын торгызырга кирәк.

Моннан тыш, Россия Президенты Владимир Путинның Россия Федерациясе Мөселманнары диния нәзарәтенә мөселман мәчете һәм мәдрәсәсе биналарының тарихи йөзен торгызуда (Мәскәү, Зур Татар урамы, 28 йорт) ярдәм итү турында тиешле күрсәтмәсе бар.