Рөстәм Миңнеханов XII Бөтенроссия татар дин әһелләре форумында катнашты

Бүген Казанда Муса Җәлил исемендәге Татар дәүләт опера һәм балет театры мәйданында XII Бөтенроссия татар дин әһелләре форумының пленар утырышы узды. Чарада РФ Хөкүмәте Рәисе урынбасары Марат Хөснуллин, Татарстан Президенты Рөстәм Миңнеханов, ТР Дәүләт Киңәшчесе Минтимер Шәймиев, ТР Дәүләт Советы Рәисе Фәрит Мөхәммәтшин, ТР вице-премьеры, Бөтендөнья татар конгрессы Милли Шура рәисе Васил Шәйхеразыев катнашты.

Бөтенроссия татар дин әһелләре форумы Казанда 19 майдан 21 майга кадәр уза. Быел бу чара Идел буе Болгар дәүләтендә Ислам динен кабул итүгә 1100 ел тулуны бәйрәм итү кысаларында оештырылды. Форумда Россиянең 76 төбәгеннән һәм 5 чит илдән 1100 дин эшлеклесе һәм кунак катнаша.

Форум делегатларын сәламләп, Васил Шәйхеразыев хәзерге Татарстан территориясендә Ислам үсеше тарихы, шулай ук 922 ел вакыйгаларының татар халкының алга таба үсешенә йогынтысы турында сөйләде. «Бүгенге көндә Ислам Россиядә иминлек юлында көндәлек тормыш алып баручы ышанычлы нигез булып тора. «Идел буе Болгарстаны тарафыннан Ислам динен кабул итүгә 1100 ел тулуга багышланган тантаналы чаралар Россия Федерациясе Президенты Владимир Владимирович Путин карары буенча уздырылуы моны тагын бер кат раслый», – дип ассызыклады республика вице-премьеры.

Марат Хөснуллин, үз чиратында, күп еллар инде Бөтенроссия татар дин әһелләре форумы Россия төбәкләреннән мөселман руханиларын берләштерә, дип билгеләп үтте. «Ил Президенты Владимир Владимирович Путин мөселманнарның җәмгыятьтә милләтара тынычлыкны һәм татулыкны ныгытуда, мәдәни күп төрлелекне саклап калуда, илебезнең өстенлекле мәнфәгатьләрен яклауда мөселманнарның лаеклы өлешен берничә тапкыр билгеләп үтте. Бүгенге форум кысаларында кабул ителгән карарлар Россия дәүләтчелегенең тотрыклы үсешенә ярдәм итәр дип ышанам», – диде РФ Премьер-министры урынбасары.

Үз чыгышында Рөстәм Миңнеханов Идел буе Болгарстаны тарафыннан Ислам динен кабул итүгә 1100 ел тулу карары белән федераль дәрәҗәдә бәйрәм ителгән Россия Президенты Владимир Путинга рәхмәт сүзләрен җиткерде. «Бу Татарстан өчен генә түгел, ә Россия мөселманнары өчен дә мөһим вакыйга», - дип ассызыклады ул.

Шулай ук Татарстан Президенты Россия вице-премьеры, федераль оештыру комитеты башлыгы Марат Хөснуллинга юбилей датасына әзерләнүдә ярдәм күрсәткәне өчен рәхмәт белдерде.

Рөстәм Миңнеханов билгеләп үткәнчә, бүгенге очрашу катлаулы чорда уза. «Мондый форумнар бик мөһим. Без очрашырга, бердәм булырга тиеш. Безгә дәүләт башлыгы тирәсендә берләшергә кирәк. Бердәмлектә – безнең көч», – дип ассызыклады ТР Президенты.

Ул билгеләп үткәнчә, 1100 еллык кысаларында тантаналы чаралар иртәгә борынгы Болгар шәһәре территориясендә дәвам итәчәк.

Аннары Рөстәм Миңнеханов мөселман дин әһелләренә Татарстан Республикасы дәүләт бүләкләрен тапшырды.