Рөстәм Миңнеханов: Халкының шактый өлеше мөселман булган Россия төбәкләрендә ислам банкингына ихтыяҗ булырга мөмкин

Халыкның шактый өлеше ислам динендә Россия төбәкләрендә ислам банкингына ихтыяҗ булырга мөмкин. Бүген бу хакта Татарстан Республикасы Президенты Рөстәм Миңнеханов «Казан Экспо» мәйданчыгында «Россия – Ислам дөньясы: KazanSummit 2022» XIII халыкара икътисади саммиты кысаларында узган SberTalk сессиясендә хәбәр итте.

Рөстәм Миңнеханов билгеләп үткәнчә, Көнбатыш санкцияләренә карамастан, ИХО илләренең күпчелеге безнең ил белән хезмәттәшлек итә. Ислам финанславы системасы сәүдә-икътисади хезмәттәшлекнең перспектив юнәлеше булып тора, дип саный Татарстан Президенты. Мондый модель көнбатыш капитал базарларына һәм сәүдә мәйданчыкларына альтернатива буларак чыгыш ясарга мөмкин.

«Россиядә ислам динендәге халык өлеше арту күзәтелә. Халкының шактый өлеше мөселман булган төбәкләр бар. Әлеге төбәкләрдә партнерлык финанславы стандартларына нигезләнгән банк продуктлары һәм хезмәтләренә ихтыяҗ бар», - дип ассызыклады ул. 

Рөстәм Миңнеханов фикеренчә, законнарга тиешле үзгәрешләр кертеп, бу секторда гына махсус структура булдыру, шулай ук РФ субъектларында салым салуның һәм банк эшенең махсус режимын билгеләү белән эксперимент үткәрү максатка ярашлы.

Сбербанкның өлкән вице-президенты Олег Ганиев корпоратив ислам финанславы сегменты мөмкинлекләрен югары бәяләде. Шәригать нормаларына туры килә торган продуктлар арасында - сәүдә финанслау, мудараба (клиентның активларына ышанычлы идарә итү), акча күчерү һәм башкалар. Якын арада Сбербанк мөселманнар өчен яңа сервислар тәкъдим итәчәк, аерым алганда, банк төзелеш өлкәсендә бизнеска кредит бирү өчен продукт булдыру өстендә эшли.

Өлкән вице-президент, Sberbank International җитәкчесе Тимур Козинцев, барлык кыенлыкларга да карамастан, Сбербанк халыкара базарларда катнашуны саклап калырга мөмкин һәм тиеш, дип сөйләде. Аның сүзләренә караганда, банк дөньяда: Азиядә, Якын Көнчыгышта һәм башка төбәкләрдә ачыла торган яңа мөмкинлекләр һәм перспективаларны актив өйрәнә.