Рөстәм Миңнеханов Татарстанда Җиңүнең 77 еллыгын бәйрәм итүгә әзерлек һәм аны уздыру буенча оештыру комитеты утырышын уздырды

Бүген Татарстан Республикасы Президенты Рөстәм Миңнеханов 2025 елда Бөек Ватан сугышында Җиңүнең 80 еллыгын бәйрәм итүгә керешергә кушты.

Бу хакта ул Татарстан Республикасында Җиңүнең 77 еллыгын бәйрәм итүгә әзерлек һәм аны уздыру буенча оештыру комитеты утырышында хәбәр итте.

Рөстәм Миңнеханов хәбәр иткәнчә, бүген үк төп чаралар планын әзерләргә кирәк. «Инде бүген үк чаралар планын әзерләргә кирәк, - диде ул. - Без бу юнәлештә эш алып барабыз. Ветераннар саны елдан-ел кими, һәм безнең бурыч – Бөек Ватан сугышында Җиңүнең 80 еллыгын лаеклы каршылау».

Рөстәм Миңнеханов шулай ук геройлар истәлеген мәңгеләштерү мәсьәләләрен аерым контрольдә тотарга кушты. Ул искә төшергәнчә, Хәтер Китабы редакциясе Бөек Ватан сугышы тарихын популярлаштыруга һәм яшьләргә патриотик тәрбия бирүгә лаеклы өлеш кертә. «1941 – 1945 еллардагы Бөек Ватан сугышы елларында Татарстан», «Социалистик хезмәт геройлары китабы», «Өч дәрәҗә Дан ордены кавалерлары» һ.б. кебек фундаменталь басмалар әзерләнде.

Оештыру комитеты утырышы ТР Хөкүмәте Йортында узды. Анда РФ Дәүләт Думасы депутаты Максим Топилин, ТР Дәүләт Киңәшчесе Минтимер Шәймиев, ТР Дәүләт Советы Рәисе Фәрит Мөхәммәтшин, ТР Премьер-министры Алексей Песошин, РФ Дәүләт Думасы депутатлары, ТР дәүләт хакимияте органнары һәм РФ дәүләт хакимияте территориаль органнары җитәкчеләре, җәмәгатьчелек вәкилләре, предприятие һәм оешмалар вәкилләре, муниципаль районнар һәм шәһәр округлары башлыклары катнашты.

Җиңү көнен бәйрәм итүгә әзерлек буенча оештыру комитеты эше турындагы нотык белән Татарстан Республикасы Премьер-министры урынбасары Ләйлә Фазлыева чыгыш ясады. Ул, аерым алганда, бүгенге көндә Татарстанда 1941 – 1945 еллардагы Бөек Ватан сугышында катнашкан 359 кеше яшәвен хәбәр итте. Бу категория ветераннар, сугыш ветераннары, инвалидлары, тыл хезмәтчәннәре һ.б. республикада 17938 кеше исәпләнә (2015 елда – 76839 кеше иде).

Оештыру комитеты утырышы барышында Ләйлә Фазлыева хәбәр иткәнчә, 2014 – 2021 елларда Бөек Ватан сугышы ветераннары яши торган 1655 фатир, йорт (торак биналар) ремонтланган. Агымдагы 2022 елда эш дәвам иттереләчәк, Казанда яшәүче ветераннарның 6 торак бинасы капиталь ремонтланачак.

Республикада 2131 Бөек Ватан сугышы ветеранына социаль хезмәт күрсәтелә, 56 ветеран социаль хезмәт күрсәтү стационар учреждениеләрендә яши. Моннан тыш, өйдә социаль хезмәт күрсәтү бүлекчәләрендә 2 меңнән артык ветеран социаль хезмәт ала.

Ләйлә Фазлыева шулай ук Татарстанда «1941 – 1945 еллардагы хезмәт батырлыгы предприятиесе» дигән республика мактаулы исеме гамәлгә куелуын искә төшерде. Әлеге исем Бөек Ватан сугышы елларында хәрби һәм гражданлык продукциясен өзлексез җитештерүне тәэмин иткән предприятиеләргә биреләчәк. (Татарстан Республикасы Президенты Указы № ПУ-266, 2022 елның 12 апреле).

Аннары нотыклар белән «Хәтер Китабы» редакциясе» дәүләт бюджет учреждениесе баш мөхәррире Рамил Вәлиев, Татарстан Республикасының Архив эше буенча дәүләт комитеты рәисе Гөлнара Габдрахманова чыгыш ясады.

Эзләнү эше турында «Химик» эзтабарлар отряды әгъзасы Александр Вершинин сөйләде.

Нотык белән шулай ук Мамадыш туган якны өйрәнү музее директоры Минзилә Садриева, Казан гарнизоны башлыгы, Жуков орденлы Кызыл байрак югары танк команда училищесы җитәкчесе Кирилл Кулаков чыгыш ясады.

Оештыру комитеты утырышы кысаларында Татарстан Президенты Бөек Ватан сугышында һәлак булган ветераннар һәм махсус хәрби операциядә катнашучылар истәлегенә бер минут тынлык игълан итте.

«Россия Федерациясенең Кораллы Көчләре бүген Украинада махсус хәрби операциядә катнаша. Изге антларын үтәп, операциядә 62 сугышчы татарстанлының гомере өзелде. Шуларның 2се Россия Герое исеменә лаек булды, 12се – Батырлык ордены белән бүләкләнде, берсе Батырлык орденына тәкъдим ителде. Батырлык һәм Ватанга тугрылык өчен без геройларыбызга чиксез рәхмәтле. Бөек Ватан сугышында һәлак булган ветераннар истәлегенә һәм махсус хәрби операциягә бер минут тынлык игълан итәргә тәкъдим итәм», - диде Рөстәм Миңнеханов.