Татарстан Урман хуҗалыгы министрлыгы башлыгы урман культуралары сезоны башлану турында хәбәр итте

2022 елда Татарстан Урман хуҗалыгы министрлыгы 34 млн. данә агач үсентесе үстерергә планлаштыра, бу узган ел дәрәҗәсенә туры килә. Бу хакта бүген ТР Хөкүмәте Йортында узган брифингта ТР урман хуҗалыгы министры Равил Кузюров хәбәр итте.

"Базислы урман питомникларында һәм Татарстанның урман селекция-орлыкчылык үзәгендә урманнарны торгызу чараларын үткәрү өчен 2021 елда 34 млн. данәдән артык стандартлы утырту материаллары үстерелгән, шул исәптән ылыслы токымнар — 25,5 млн. данә, яфраклы токымнар — 7,9 млн. данә, куаклар — 700 мең данә», — дип сөйләде министр.

Урман хуҗалыгы министрлыгы башлыгы аңлатып үткәнчә, узган елда аномаль эсселек аркасында урман питомникларында чәчүлекләрнең коры торуы күзәтелде, һәлак булган чәчүлекләрнең мәйданы 2,5 гектар тәшкил итте (бу 3 млн данә орлык).

"2022 елга планнарда - эш темпларын киметмәү һәм шул ук күләмдә үсемтеләр үстерү. Апрель аенда ТР урман селекция-орлыкчылык үзәгендә беренче ротация кысаларында 4 млн данә чыршы, нарат һәм каен орлыгы чәчелгән инде. Хәзерге вакытта үсентеләр теплицаларда көч туплый, аннан соң басуларга күчереләчәк", - дип билгеләп үтте Р.Кузюров. Базислы урман питомникларында май аенда 20 гектар мәйданда чәчү планлаштырыла.

Бер ел эчендә "Экология" илкүләм проекты буенча яңадан торгызу һәм урман үрчетү 5,4 мең гектарга арттырылачак, министр сүзләренчә, урман культуралары сезоны Татарстанда явым-төшем күп булу сәбәпле соңрак башланачак. Чараларга 25 апрельдән соң керешү планлаштырыла. Татарстанда урманнарны торгызу эшләре инде дүртенче ел рәттән "Татарстан Республикасында урманнарны саклау региональ проекты, "Урманнарны саклау" федераль проекты, "Экология" илкүләм проекты кысаларында үткәрелә. Узган ел Татарстан урманчылары урманнарны торгызу буенча планны ике тапкыр арттырып үтәгән, алар 4210 гектар мәйданда башкарылган.

Равил Кузюров 25 апрельдән соң янгын куркынычы чоры башлану турында кисәтте. Бу чорда Татарстанда янгынга каршы махсус режим кертеләчәк. Шул ук вакытта тиешле хокук бозулар өчен штрафлар арттырылачак.