Рөстәм Миңнеханов Мәскәүдә К. Тимирязев исемендәге Россия дәүләт аграр университетында булды

Татарстан Республикасы Президенты Рөстәм Миңнеханов К.Тимирязев исемендәге Россия дәүләт аграр университетында булды. Бүген Татарстан Республикасы Президенты Рөстәм Миңнеханов Мәскәүдә эш сәфәрендә.

Югары уку йорты авыл хуҗалыгы өчен югары квалификацияле кадрлар әзерләү белән шөгыльләнә. Бүген ул 8 институтны, 79 кафедраны берләштерә, анда 18 000 студент белем ала. Алар арасында татарстанлылар да бар – 82 кеше.

Республика Президентына аквакультура кафедрасын күрсәттеләр, анда лабораторияләрнең эш үзенчәлекләре турында сөйләделәр, селекция – орлыкчылык үзәге, бакчачылык һәм яшелчәчелек үзәге һәм башкалар турында сөйләделәр.

Республика компанияләре һәм оешмалары күп еллар дәвамында Аграр университет белән стратегик партнерлык алып бара. Аерым алганда, бу – «Татарстанның элиталы орлыклары» ассоциациясе, Татар авыл хуҗалыгы фәнни-тикшеренү институты, Казан дәүләт аграр университеты, «Иннополис Университеты» ЮБББО, «Россельхозцентр» ФДБУнең Татарстан Республикасы филиалы, Казан федераль университеты (КФУ).

Мондый хезмәттәшлек квалификация күтәрү өчен даими белем бирү курслары үткәрергә мөмкинлек бирә. 2021 елда, Иннополис белән хезмәттәшлек итеп, мәгариф программасы буенча яңа буын агрономнарын әзерләү башланган.

Университетта булганда Рөстәм Миңнеханов Татарстан студентлары белән очрашты. «Бүген безнең илнең агросәнәгать комплексы – иң эре экспортер. Сезнең һөнәрегез бик кирәк, ә белемегез, кайда гына эшләсәгез дә, кирәк булачак», - диде ул әңгәмә барышында.

Рөстәм Миңнеханов республика практика узуны, делегацияләр алмашуны оештырырга әзер, дип ышандырды. «Без бүген авыл тормышы шәһәрнекеннән нык аерылып тормасын өчен күп эш башкарабыз. Безнең бурыч – кешеләр китмәсен, киресенчә, авылга эшләргә, бигрәк тә сезнең юнәлеш, авыл хуҗалыгы буенча эшләргә килсен өчен яхшы шартлар булдыру», - диде ТР Президенты.

Студентлар Татарстанда яшь белгечләргә ярдәм итү чаралары, заманча авыл хуҗалыгы предприятиеләре булуы белән кызыксындылар.

Очрашу азагында югары уку йорт ректоры Рөстәм Миңнехановка икътисад фәннәре докторы гыйльми дәрәҗәсенә дәгъва кылуга шәхси эш күчермәсен тапшырды, аны ул 2001 елда «Икътисад һәм халык хуҗалыгына идарә итү» белгечлеге буенча яклаган.