Рөстәм Миңнеханов Татарстан Республикасында Террорчылыкка каршы комиссиянең киңәйтелгән утырышын уздырды

Бүген Татарстан Республикасы Президенты, Террорчылыкка каршы комиссия рәисе Рөстәм Миңнеханов Татарстан Республикасында Террорчылыкка каршы комиссиянең чираттагы киңәйтелгән утырышын уздырды.

Чара Татарстан Республикасы Хөкүмәте Йортында узды.

Утырыш белем бирү мохитенең психологик куркынычсызлыгы мәсьәләләренә багышланды.

Утырышта юнәлеш федераль министрлыклары вәкилләре, шулай ук Илкүләм террорчылыкка каршы комитет Аппаратының беренче урынбасары – вице-адмирал Игорь Кулягин катнашты.

Рөстәм Миңнеханов сүзләренчә, соңгы 3 елда республикада укучылар һәм студентлар катнашында резонанслы вакыйгалар булган. Болар барысы да яшьләр арасында психологик дәрәҗәдә яшүсмерләргә тискәре йогынты ясаучы деструктив виртуаль берләшмәләрдән чыккан тискәре процесслар турында сөйли.

Яшьләр һәм мәгариф даирәсендә киеренкелекне киметү өчен фәнни потенциал җәлеп ителгән, инновацион проектларны да кертеп, төрле проектлар гамәлгә ашырыла. Федераль һәм төбәк дәрәҗәсендә уртак көч белән бу феноменнарны өйрәнеп, профилактик эшнең нәтиҗәлелеген арттыру һәм киләчәктә билгеләнгән янауларны киметү өчен механизмнар эшли алдык.

Рөстәм Миңнеханов билгеләп үткәнчә, яшьләр сәясәтендә – югары һәм урта махсус уку йортлары дәрәҗәсендә ведомствоара хезмәттәшлеккә аерым игътибар бирергә, шулай ук югары белем бирү системасында психологик хезмәтләрне үстерүне дәвам итәргә кирәк.

Рөстәм Миңнеханов сүзләренә караганда, бүген тәрбия эшен оештыруда проблемалар бар, психология өлкәсендә специфик белем җитмәү, шулай ук укучылар белән эшләүче квалификацияле психологлар җитмәү.

Утырыш барышында билгеләп үтелгәнчә, хәзерге шартларда психолог белгечләрнең бер өлешен цифрлы мохиткә күчерергә кирәк.

Балигъ булмаганнарга һәм аларның ата-аналарына психологик ярдәм күрсәтү өчен билгеләнгән цифрлы платформа булдыру концепциясе буенча фикер алыштылар.

Татарстан Республикасында Террорчылыкка каршы комиссия әгъзалары «Өстенлек-2030» стратегик академия лидерлыгы программасын гамәлгә ашыруның барышы һәм Татарстан Республикасының белем бирү тирәлеге иминлеген комплекслы тикшерү буенча тәкъдимнәр турында фикер алыштылар.