ТР Экология министрлыгы башлыгы: 1 апрельдән Татарстанда гадәттәгечә санитар-экологик икеайлык башлана

1 апрельдән республикада гадәттәгечә санитар-экологик икеайлык башлана. Барлык күзәтчелек органнары булачак чараларга тиешенчә оештыру эшләрен башкарды. Бу хакта бүген ТР Хөкүмәте Йортында узган брифингта ТР экология һәм табигый ресурслар министры Александр Шадриков хәбәр итте.

Министр искәрткәнчә, икеайлыкның төп максаты - торак пунктлар территорияләрен санитар чистарту, чүплекләрне, кышкы чорда җыелган чүплекләрне ачыклау һәм бетерү, кар катламнары эрегәч, территорияләрне тиешле экологик һәм санитар-эпидемиологик халәткә китерү.  

Горький һәм Куйбышев тимер юлларының Казан төбәгенә бүлеп бирелгән полосаларны һәм алар янәшәсендәге территорияләрне «Россия тимер юллары» ААҖ катнашында гадәттәгечә йөреп чыгу планлаштырыла. Шулай ук «Юл хәрәкәте иминлеге» ДБУ да актив катнаша. Территорияләрне тикшерүгә авиация дә җәлеп ителә. Аеруча игътибар су саклау зоналарының торышына, шул исәптән терлекчелек калдыкларын саклау зоналарында туплау фактларына биреләчәк.

Узган елгы санитар-экологик икеайлык кысаларында республикада 5 меңнән артык хокук бозу очрагы ачыкланган һәм бетерелгән, административ хокук бозулар турында 3 меңнән артык беркетмә төзелгән. 13 млн. сумнан артык штраф салынган. 4 меңгә якын рөхсәтсез калдыклар ташлау урыны ачыкланган, икеайлык азагына 96% ы бетерелгән. Узган ел урып-җыюда барлыгы 780 меңнән артык кеше катнашты. Каты көнкүреш калдыклары полигоннарына 420 мең куб. м тирәсе калдык чыгарылган, 700 меңнән артык агач һәм куак утыртылган.