Татарстан Президенты: «Бердәм Россия» республиканың иҗтимагый-сәяси үсешендә әйдәп баручы роль уйный

Татарстан Президенты Рөстәм Миңнеханов «Бердәм Россия» партиясе Татарстан төбәк бүлегенең 34 нче хисап-сайлау конференциясендә катнашты.

Чара Идел буе дәүләт физик культура, спорт һәм туризм университеты мәйданчыгында узды. Анда шулай ук партиянең Генераль советы секретаре Андрей Турчак та катнашты.

«Бүген «Бердәм Россия» республиканың иҗтимагый-сәяси үсешендә әйдәп баручы роль уйный, профессиональ кадрлар составы бар, илкүләм проектларны һәм республика программаларын гамәлгә ашыруда ярдәм итә», - диде Рөстәм Миңнеханов сәламләү сүзендә.

Ул төбәк бүлекчәсенең Россиядә иң эреләреннән булуына игътибар итте. Партия эшендә республика активы, район башлыклары, предприятие җитәкчеләре катнаша. Партия үзенең көндәлек эшчәнлегендә сайлаучылар сорауларына таяна, закон чыгаруда, хакимиятнең барлык дәрәҗәләрендә гражданнарның мәнфәгатьләрен тәкъдим итүдә нәтиҗәле катнаша.

Рөстәм Миңнеханов билгеләп үткәнчә, партия эше нәтиҗәләре сайлаулар нәтиҗәсендә һәрвакыт чагылыш таба: «Татарстан сайлаучылары «Бердәм Россия» партиясенең Дәүләт Думасына кампания кысаларында җиңүенә максималь өлеш керттеләр – аның өчен Татарстанда 1,8 млн кеше тавыш бирде».

Татарстан Президенты билгеләп үткәнчә, соңгы 5 елда татарстанлылар республика парламентын сайлады, район һәм шәһәр советларын тулысынча формалаштырдылар, Дәүләт Думасы депутатларын сайладылар. «Партия һәр дәрәҗәдә тотрыклы күпчелеккә ия, бу зур җаваплылык йөкли. Соңгы елларда без бергәләп җиңеп чыккан өндәүләр шактый булды. Аерым билгеләп үтәсем килә һәм депутатларга, партиянең волонтерлык штабына пандемия чатаклыкларын ярдәм итүләре, кешеләргә ярдәм күрсәтүләре өчен рәхмәт белдерәсем килә», - дип ассызыклады ул.

Рөстәм Миңнеханов искә төшергәнчә, узган елның декабрендә партия съездына мөрәҗәгать итеп, Владимир Путин «Безнең сәясәт, безнең уртак планнарыбыз үзәгендә нәкъ менә кеше». Ә партия Рәисе Дмитрий Медведев съезд барышында партиянең төп максатын билгеләде – федераль халык программасында куелган йөкләмәләрне тулысынча үтәү.

«Әлеге бурычлар – безнең өчен өстенлекле бурычлар», - диде Рөстәм Миңнеханов. Ул билгеләп үткәнчә, бу максатларда республикада күп кенә социаль проектлар һәм программалар нәтиҗәле гамәлгә ашырыла. Бу – уңайлы торак төзелеше һәм торак фондын капиталь ремонтлау, яңа мәктәпләр һәм балалар бакчалары төзү, мәдәният һәм спорт объектларын ачу, хастаханәләрне яңа җиһазлар белән тәэмин итү, беренчел звеноны модернизацияләү, юллар салу һәм ремонтлау, паркларны, скверларны һәм ишегалларын төзекләндерү.

«Бүген «Бердәм Россия» илдәге барлык вакыйгалар өчен җавап бирә, иҗтимагый-сәяси тотрыклылыкны тәэмин итә. Шәхсән үз исемемнән, Татарстан Хөкүмәте исеменнән уртак җайга салынган эшегез өчен рәхмәт белдерәсем килә. Фәрит Хәйрулла улы Мөхәммәтшин җитәкчелегендәге партиянең Татарстан бүлеге лаеклы һәм нәтиҗәле эшли дип саныйм», - дип белдерде ТР Президенты.

Ул алда җаваплы процедура – партиянең җитәкче органнарын сайлау, дип өстәде. «Сез лидерлык сыйфатларына ия булган абруйлы көрәшчеләргә ярдәм итәрсез дип ышанам. Конференциядә катнашучыларга эчтәлекле эш, уңышлар һәм яңа җиңүләр телим», - дип ассызыклады Рөстәм Миңнеханов һәм Татарстан Республикасы дәүләт бүләкләрен тапшырды.

Андрей Турчак үз чиратында билгеләп үткәнчә, «Бердәм Россия» партиясенең Татарстан төбәк бүлеге – илдә иң зуры һәм нәтиҗәлесе. «Татарстан, гадәттәгечә, Дәүләт Думасында депутатларның зур төркеме тарафыннан тәкъдим ителде. Сайлау кампанияләре нәтиҗәсендә безнең республика Дәүләт Советында гына түгел, ә җирле үзидарә органнарында да тотрыклы позицияләребез бар. Рөстәм Нургалиевич Миңнеханов татарстанлыларның тормыш сыйфатын яхшырту буенча зур бурычлар куя –  «Бердәм Россия» өчен бу федераль халык программасында да, аның республика бүлегендә дә беркетелгән өстенлекле юнәлеш», - дип өстәде партиянең Генераль советы секретаре.

Партиянең Татарстан бүлеге секретаре Фәрит Мөхәммәтшин Политсоветның биш елдагы эше турында хисап тотты һәм якын киләчәккә бурычлар билгеләде. Хәзерге вакытта Татарстанда «Бердәм Россия» 45 җирле һәм 2011 беренчел бүлекне берләштерә, үз сафларында 129 мең 680 кеше исәпләнә. Татарстанда гражданнар мөрәҗәгатьләре белән 52 җәмәгать кабул итү бүлмәсе эшли.

Сайлау кампанияләре барышында алынган наказларны һәм тәкъдимнәрне үтәү партия эшенең төп өстенлекләреннән берсе булып тора. Хакимият тармакларының конструктив хезмәттәшлеге, ТР Президенты, Хөкүмәте ярдәме белән алынган наказлар – һәм бу бишьеллыкның яңалыгы – хәзер республика һәм муниципаль программаларда («юл картасы») конкрет сроклар һәм бюджеттан финанслау белән чагылыш таба.

Россиядә яшәүчеләрдән кергән тәкъдимнәрне анализлау нигезендә (2,5 млн.нан артык, шуларның 20 меңнән артыгы – татарстанлылар) якын арада һәм 2024 елга кадәр партия эшчәнлегенең төгәл курсы расланды. Аның төп параметрлары арасында – актуаль социаль-икътисадый көн тәртибе, ачыклык, яңарту һәм социаль гаделлеккә ихтыяҗ.

Партиянең төбәк бүлеге үз эшенең мөһим юнәлешләренең берсе санлы компетенцияләрне һәм платформаларны үстерүне, шулай ук илкүләм (14 федераль һәм 4 төбәк) һәм партия проектлары кысаларында алга таба эшчәнлекне саный.