Татарстан Республикасы Авыл хуҗалыгы һәм азык-төлек министрлыгы башлыгы: 2021 елда Татарстан аграрийлары 4,6 меңнән артык яңа авыл хуҗалыгы техникасы һәм җиһазлары сатып алган

ТР Хөкүмәте Йортында узган республика киңәшмәсендә ТР Премьер-министры урынбасары – ТР авыл хуҗалыгы һәм азык-төлек министры Марат Җәббаров 2021 ел нәтиҗәләре буенча республиканың агросәнәгать комплексында хезмәтне саклау һәм техник модернизацияләү турында сөйләде. Киңәшмәне барлык муниципаль районнар белән видеоконференцэлемтә режимында Татарстан Республикасы Президенты Рөстәм Миңнеханов уздырды.

Марат Җәббаров хәбәр иткәнчә, 2021 елда авыл хуҗалыгы производствосында 5 хезмәткәр җәрәхәт алган. Моннан тыш, җитештерүгә бәйле эш урынында 3 үлем очрагы теркәлгән. Иң куркыныч һөнәрләр – терлекче һәм механизатор. Авыр имгәнүләрнең төп сәбәбе – хезмәт дисциплинасын бозу.

Министр искәрткәнчә, эш бирүчеләр үз эшчеләре алдында җаваплы. Аларны вакытында махсус кием белән тәэмин итәргә, хезмәт шартларын булдырырга һәм сакларга, эш урыннарында инструктажлар үткәрергә кирәк.

2021 елда авыл хуҗалыгы формированиеләренең хезмәтне саклау чараларына чыгымнары 277 млн. сум яки 1 хезмәткәргә 6500 сум тәшкил иткән, бу узган ел белән чагыштырганда 29%ка артык.

Министр хәбәр иткәнчә, 2021 елның 20 декабреннән 2022 елның 9 гыйнварына кадәр республикада янгынга каршы махсус режим кертелгән. «Район активларына, башлыкларга, идарә башлыкларына, җитәкчеләргә тагын бер кат мөрәҗәгать итәм. Дөньяда кеше гомереннән һәм сәламәтлегеннән кыйммәтрәк һәм мөһимрәк берни дә юк. Хезмәткәрләрнең сәламәтлеге, шул исәптән хуҗалыкларның иминлеге хезмәтне саклау буенча эшләрне дөрес оештыруга бәйле булачак», - дип ассызыклады Марат Җәббаров.

2021 елда модернизация актив алып барыла. Хуҗалыклар 13,6 млрд. сумнан артык суммага 4667 берәмлек авыл хуҗалыгы техникасы һәм җиһазлары сатып алган. Бу – 508 трактор, 328 ашлык җыю комбайны, 80 азык җыю комбайны, 115 үзйөрешле су сиптергеч, 3636 берәмлек төрле техника һәм җиһазлар. «Росагролизинг» ташламалы программалары буенча 3,2 млрд. сумлык 637 берәмлек техника сатып алынган.

Соңыннан министр Әтнә районын билгеләп үтте, анда 20 декабрьдә авыл хуҗалыгы оешмалары беренче тапкыр тәүлегенә 300 тонна сөт савып алганнар.

Рөстәм Миңнеханов Әтнә аграрийларына республиканың авыл хуҗалыгы үсешенә зур өлеш керткәннәре өчен рәхмәт белдерде.