Рөстәм Миңнеханов җирле үзидарәнең республиканың социаль-икътисадый үсешенә керткән зур өлешен билгеләп үтте

Пандемиягә карамастан, федераль һәм республика дәрәҗәсендә кабул ителгән чаралар, шулай ук җирле үзидарәнең актив катнашуы республиканың социаль-икътисадый үсеше өлкәсендә масштаблы бурычларны уңышлы тормышка ашырырга мөмкинлек бирде. Бүген бу хакта Татарстан Республикасы Президенты Рөстәм Миңнеханов «Татарстан Республикасы Муниципаль берәмлекләре советы» ассоциациясенең XVI съездында хәбәр итте. Чара «Корстон-Казан» КСКК мәйданчыгында узды.

Утырыш башланыр алдыннан Рөстәм Миңнехановка Саклык банкында уку нәтиҗәләре буенча район башлыклары тарафыннан эшләнгән дүрт проектны тәкъдим иттеләр. Татарстан Республикасы Президентына гражданнар мөрәҗәгатьләрен эшкәртү өчен бердәм платформа («Берләшкән коммуникацияләр системасы») булдырырга, үзара салым программасын гамәлгә ашыруны контрольдә тоту буенча цифрлы карар («Цифрлы үзлегеңнән салым»), инженер челтәрләренең торышы турында соңгы мәгълүматларны («Инженерлык челтәрләре турында мәгълүмат булган районнарның электрон картасы») берләштерә торган система булдырырга һәм авылда медицинаның беренчел звеносында цифрлы инструментларны («Цифрлы ФАП») кертергә тәкъдим иттеләр.

Үз чыгышында Рөстәм Миңнеханов республиканың социаль-икътисадый үсешенең төп нәтиҗәләрен билгеләде, авылда бизнесны үстерү, агросәнәгать комплексына ярдәм итү, авыл халкын эш белән тәэмин итүнең мөһимлеген ассызыклады.

Татарстан Президенты билгеләп үткәнчә, пандемия шартларында барлык дәрәҗәдәге хакимият органнарының төп бурычы – авыручылар санын киметү һәм җәмгыятьне нормаль тормыш шартларына кайтару. «Җирле хакимиятләр өчен – аерым җаваплылык: бу чикләүләрне катгый үтәүне тәэмин итү, халыкны вакцинацияләүне оештыру, коллектив иммунитетны формалаштыру. Вакцинациядән башка юл юк. Моннан башка мөмкин түгел. Бу мәгълүматны халыкка җиткерергә кирәк. Иң мөһиме – гражданнарыбызның сәламәтлеге һәм тормышы», - дип ассызыклады ул.

Рөстәм Миңнеханов Бөтенроссия халык санын алуны югары дәрәҗәдә уздыруны билгеләп үтте. Бүген халык санын алуның башлангыч нәтиҗәләре Татарстан халкының саны арту тенденциясе турында сөйли. «Республика үз потенциалын үстерә, икътисады, мәгариф учреждениеләре, инвестицион климат белән җәлеп итә, ә тормыш сыйфаты буенча Татарстан – Россиядә лидерларның берсе. Без ил җитәкчелегенә, шәхсән Россия Президентына һәм Хөкүмәткә, гражданнарга ярдәм итүнең масштаблы чаралары өчен рәхмәтлебез», - диде ТР Президенты.

Рөстәм Миңнеханов елның төп икътисадый нәтиҗәләрен уңай бәяләде. Республика тулаем төбәк продукты – 103,8%, ИПП – 108,3%, төзелеш эшләре күләме үсеше – 103,1%, ваклап сату әйләнеше үсеше көтелә, сәүдә – 106,2%, төп капиталга инвестицияләр – 660 млрд.сум. Татарстан Президенты сүзләренчә, республика икътисады үсеше, барыннан да элек, нефть, газ, химия комплексы, машина төзелеше, энергетика, төзелеш белән тәэмин ителә. Эре инвестпроектларны гамәлгә ашыру, СИҮАБТ, махсус икътисадый зоналар һәм сәнәгать мәйданчыкларын үстерү буенча зур эш алып барыла.

Агросәнәгать секторы быел корылыктан җитди зыян күрде. Рөстәм Миңнеханов билгеләп үткәнчә, һава торышы һәм явым-төшемнәр буенча ситуация 2010 елга якын иде. Әмма сугару системаларын үстерү, дымга чыдам культуралар һәм прогрессив агротехнологияләрне куллану аграрийларга 2010 елга караганда 3,5 тапкырга күбрәк уңыш җыеп алырга мөмкинлек бирде. «Без мондый тәвәккәллекләргә әзер булырга тиеш. Бездә резервлар булырга тиеш. Мондый катлаулы шартларда эшли белергә кирәк», - дип ассызыклады ТР Президенты.

Республикада кече һәм урта бизнесны үстерүгә җитди игътибар бирелә. Татарстанда бүген 159 меңнән артык кече һәм урта эшкуарлык субъекты эшли, 156 мең үзмәшгуль граждан теркәлгән. Агымдагы елның 9 аенда кече һәм урта предприятиеләр әйләнеше 16% үсеш күрсәтә. Рөстәм Миңнеханов пандемиягә бәйле чикләүләр шартларында электрон коммерция җитди импульс алды, дип игътибар итте. Татарстанның 16 меңнән артык тәэмин итүчесе интернет-мәйданчыкларда үз товарларын тәкъдим итә.

Татарстан Республикасы Президенты сәнәгать паркларының нәтиҗәлелеге мәсьәләсенә аерым тукталды. Бүген 94 сәнәгать мәйданчыгында 1,5 мең резидент эшли, 39 меңнән артык эш урыны булдырылган. Шул ук вакытта «Актаныш», «Буа» сәнәгать парклары, Яңа Чишмә районы сәнәгать паркы һәм Әлки районындагы «Алтын Үзән» күрсәткечләре түбән. Рөстәм Миңнеханов район башлыкларына әлеге мәйданчыкларда эшлекле активлыкны арттыру буенча эшне көчәйтергә кушты.