Алексей Песошин “ТР өчен 50 иң яхшы инновацион идея” конкурсында җиңүчеләрне бүләкләде

Бүген Татарстан Премьер-министры Алексей Песошин “Татарстан өчен 50 иң яхшы инновацион идея”  XVII республика конкурсы җиңүчеләрен бүләкләү тантанасында катнашты.

Бу чара “Корстон” сәүдә-күңел ачу комплексы мәйданчыгында узды.

Конкурс Татарстанда тикшеренү һәм фәнни-техник эшчәнлекне стимуллаштыру һәм популярлаштыру өчен булдырылган. Быел конкурска 1953 гариза килгән. Сайлау нәтиҗәсендә экспертлар төрле номинацияләрдә 165 җиңүчене билгеләделәр, алар 25 мең сумнан 220 мең сумга кадәр алачаклар.

Алексей Песошин ассызыклаганча, әлеге конкурс идеяләр һәм талантларны эзләүнең һәм ачуның нәтиҗәле формасы булып тора, анда талантлы уйлап табучыларга ярдәм итәргә һәм аларның иң яхшыларын сайларга мөмкинлек бар.

“Бу мәйданчык инновацион инфраструктура институтлары, университетлар, һөнәри ассоциацияләр һәм төзелә торган предприятиеләр арасында нәтиҗәле элемтә булдырырга мөмкинлек бирә”, - диде ул.

ТР Хөкүмәте башлыгы билгеләгәнчә, икътисадның инновацион эшчәнлек инфраструктурасы тирәсендә республиканың яңа кадрлар потенциалы формалаша. Шуңа күрә Татарстан барлык инвестиция компанияләре һәм инноваторлар белән хезмәттәшлеккә әзер, алар үз көчләрен көндәшлеккә сәләтле фәнни продукцияне эшләүгә, алга этәрүгә һәм җитештерүгә салырга әзер.

“Конкурста катнашучыларның барысының да идеяләре илебездә генә түгел, ә бәлки бөтен дөньяда конкрет проектларга әверелүен телим”, - дип өстәде Алексей Песошин.

Аннары ТР Премьер-министры “Перспектива” номинациясендә җиңүчеләрне бүләкләде.