Рөстәм Миңнеханов: район һәм шәһәр башлыклары юл хәрәкәте иминлеген тәэмин итү буенча чараларны гамәлгә ашыруны игътибар белән күзәтергә тиеш

Татарстан Президенты Рөстәм Миңнеханов район һәм шәһәр башлыкларына юл хәрәкәте иминлеген тәэмин итү буенча чараларны гамәлгә ашыруны игътибар белән күзәтергә кушты. Бу хакта ул бүген Татарстан Республикасы Министрлар Кабинеты һәм Татарстан Республикасы буенча Эчке эшләр министрлыгы коллегиясенең уртак утырышында белдерде. Чара Татарстан Республикасы Хөкүмәте Йортында узды. Катнашучылар Татарстан Республикасында юл хәрәкәте иминлеген арттыру, юл-транспорт һәлакәтләрен киметү һәм аларның авыр нәтиҗәләрен киметү мәсьәләләре турында фикер алыштылар.

Алексей Песошин билгеләп үткәнчә, быел федераль һәм төбәк әһәмиятендәге автомобиль юлларын төзү, реконструкцияләү, капиталь ремонтлау һәм ремонтлау буенча «Имин сыйфатлы юллар» илкүләм проекты кысаларында һәм 2021 елга юл эшләре программасы хисабына шактый эш башкарылган. Юл-транспорт һәлакәтләренең тупланган урыннары, 2020 елда авыр нәтиҗәләргә китергән юл участоклары билгеләнгән. Аларны бетерү буенча шактый эшләр башкарылган.

«Министрлыклар, ведомстволар һәм муниципалитетлар тарафыннан күрелгән чаралар нәтиҗәсендә республика территориясендә 11 ай эчендә авариянең төп күрсәткечләре кимүнең уңай динамикасы беркетелгән. «Имин сыйфатлы юллар» илкүләм проектының фараз күрсәткечләренә ирешелде», - диде Татарстан Республикасы Премьер-министры.

Төп нотык белән Татарстан Республикасы буенча Эчке эшләр министры Артем Хохорин чыгыш ясады. Ул, аерым алганда, хәбәр иткәнчә, ел башыннан Татарстан юлларында җәяүлеләрне бәрдерүнең 914 очрагы булган. Узган ел белән чагыштырганда үлем очраклары кимегән. Узган ел машина таптап 89 кеше үлгән булса, быел исә – 79.

Шул ук вакытта аварияләрдә һәлак булган балалар саны 2 тапкырга диярлек арткан: 2020 елда – 8, 2021 елда – 14. Артем Хохорин билгеләп үткәнчә, бу хәл зур борчу тудыра.

Татарстан Республикасында «Имин сыйфатлы юллар» илкүләм проектын гамәлгә ашыру, юл хәрәкәте иминлеген арттыру буенча күрелә торган чаралар турында ТР Транспорт һәм юл хуҗалыгы министры Фәрит Хәнифов хәбәр итте.

ТР Мәгариф һәм фән министры Илсур Һадиуллин балаларның юл-транспорт имгәнүен кисәтү, яшь инспекторларының эшчәнлеген үстерү һәм үсеп килүче буынны юлларда куркынычсызлыкны тәэмин итүгә җәлеп итү буенча министрлык тарафыннан күрелә торган чаралар турында сөйләде.

Юл хәрәкәте иминлеге өлкәсендә административ хокук бозулар турындагы эшләр буенча карарларны үтәү эшен оештыру турында Федераль суд приставлары хезмәтенең ТР буенча идарәсе җитәкчесе Әнвәр Закиров мәгълүмат бирде.

Үз чыгышында Рөстәм Миңнеханов ассызыклаганча, бүген юл хәрәкәте иминлеге проблемасын хәл итү буенча барлык республика ведомстволары һәм җирле үзидарә органнары эшли. Комплекслы эш аерым уңай нәтиҗәләр бирә. Әмма проблемалы мәсьәләләр дә саклана.

Барыннан да элек ул җәяүлеләрнең иминлеген тәэмин итүгә игътибар итте. Күчешләрне төзекләндерү буенча инженерлык чараларын комплекслы гамәлгә ашыру күрсәткечләрне сизелерлек яхшыртырга мөмкинлек бирде. Әмма бу юнәлештә эшләр күп әле, диде Рөстәм Миңнеханов. Ул җәяүлеләрнең үзләренең, бигрәк тә төнге вакытта игътибарлы булулары мөһимлеген билгеләп үтте. Шулай ук Татарстан Президенты башка төбәкләрнең тәҗрибәсен өйрәнергә һәм уңай тәҗрибәләрне үзләштерергә тәкъдим итте.

Рөстәм Миңнеханов сүзләренә караганда, балалар катнашында авария сәбәпләренең берсе – нәтиҗәле профилактик эшнең җитәрлек булмавы. Уку йортларында тематик дәресләр бер төрле характерда булырга тиеш түгел, дип ассызыклады ул, әлеге эшне массакүләм мәгълүмат чаралары һәм социаль челтәрләр аша оештырырга кирәк.

Балаларны йөртүгә бәйле проблемалар бар. Рөстәм Миңнеханов балаларны мәктәпләргә, ярышларга һәм экскурсиягә алып барганда автобусларның торышын катгый контрольдә тотарга өндәде. Мондый автобус йөртүчеләр зур җаваплылык тоярга тиеш, дип билгеләп үтте ТР Президенты.

Республикада пассажирлар йөртү буенча легаль булмаган эш дәвам итә. «Без бу мәсьәлә турында фикер алыштык инде. Монда районнар белән бергә тәртип урнаштырырга кирәк. Барысы да законлаштырылырга һәм пассажирлар иминлегенең барлык таләпләре нигезендә гамәлгә ашырылырга тиеш», - дип ассызыклады Рөстәм Миңнеханов.

ТР Президенты машина йөртүчеләрне әзерләү системасына аерым игътибар бирергә өндәде. Аның сүзләренә караганда, биредә даими контроль булырга тиеш. Аварияләрне киметүнең төп элементы дип Рөстәм Миңнеханов юл хәрәкәте культурасын үстерүне атады. «Безнең юлларда тизлек белән куучылар күп. Шул ук мотоциклчылар. Мин мототранспортка каршы түгел, әмма барысы да кагыйдәләр буенча булырга тиеш. Кайберәүләр исә төнлә куа, бик нык тавыш чыгарып, һәм гражданнарның тынычлыгын боза. Моннан тыш, алар хәрәкәтнең башка катнашучылары өчен куркыныч тудыручы тизлек белән йөри. Шулай булырга тиеш түгел, бу мәсьәлә белән шөгыльләнергә кирәк», - диде Татарстан Президенты.

Электр самокатларын прокатка бирү буенча хезмәт күрсәтү өлкәсендә аерым мәсьәләләр кала. Рөстәм Миңнеханов тизлекне чикләү турындагы карарны уңай бәяләде.

М-12 магистрале төзелешенә җәлеп ителгән юл техникасын эксплуатацияләүгә бәйле кайбер мәсьәләләр бар. Рөстәм Миңнеханов машина йөртүчеләрне дә, транспорт чараларын да контрольдә тотарга кушты.

Утырыш ахырында Татарстан Президенты «Куркынычсыз тәгәрмәч» бөтенроссия конкурсында җиңү яулаган яшь хәрәкәт инспекторларының Татарстан командасын бүләкләде.