Рөстәм Миңнеханов: Бүген Сбер төркеме – инновацияләр буенча лидер

Татарстан Президенты Рөстәм Миңнеханов һәм Саклык банкының Идел-Нократ банкы рәисе Петр Колтыпин «Сбербанк» ГАҖнең 180 еллыгына багышланган тантаналы чарада катнаштылар. Тантана «Татарстан Банкы» бүлеге бинасында узды.

Рөстәм Миңнеханов билгеләп үткәнчә, 180 ел эчендә Сбербанк бер кассалы 7 кешелек штаттан алып миллионлаган кешеләргә хезмәт күрсәтүче зур экосистемага әверелгән. «Бүген Сбер төркеме инновацияләр буенча лидер булып тора, банк өлкәсендә, цифрлаштыру, ясалма интеллект өлкәсендә иң заманча хәл ителешләрне гамәлгә ашыра», - дип ассызыклады ТР Президенты.

Ул Сбер төркеме җитәкчелегенә республика территориясендә проектларны гамәлгә ашырган өчен рәхмәт белдерде. «Безнең инновацион эшләнмәләрне һәм банк сервисларын гамәлгә кертүнең уңышлы мисаллары бар», - диде Рөстәм Миңнеханов.

Татарстан Президенты банк хезмәткәрләрен юбилей датасы белән котлады һәм киләчәктә дә уңышлы үсеш теләде.

Аннары Рөстәм Миңнеханов Татарстан Республикасы дәүләт бүләкләрен тапшырды.