Рөстәм Миңнеханов ТР Дәүләт архивы бинасын карады

Татарстан Президенты Рөстәм Миңнеханов республика  Дәүләт архивының берничә бинасында булды. Аны Татарстан Премьер-министрының беренче урынбасары Рөстәм Нигъмәтуллин, Татарстан Республикасының Архив эше буенча Дәүләт комитеты рәисе Гөлнара Габдрахманова һәм Казан мэры Илсур Метшин озата йөрде.

Исегезгә төшерәбез, ТР Дәүләт архивы Казан филиалларының фондларын Столбище бистәсендәге махсуслаштырылган бинага күчерә. Объект барлык янгын куркынычсызлыгы, вентиляция, саклау шартлары, комплектлау, документларны исәпкә алу буенча җиһазландырылган.

Рөстәм Миңнеханов ТР Дәүләт архивыннан бушанучы объектларны карады, шулай ук аларны алга таба эксплуатацияләү мәсьәләләре турында фикер алышты. Аерым алганда, Президент 8 нче Март урамындагы бинада Казан муниципаль архивын урнаштыру турында карар кабул итте. Гөлнара Габдрахманова хәбәр иткәнчә, биредә гражданнардан мөрәҗәгатьләр кабул итү буенча элеккеге функционал сакланачак. «Монда республика халкыннан мөрәҗәгатьләр кабул итүнең төп пункты бар. Шулай ук бу бинада уку залы да бар. Бу функционал Дәүләт архивындагы кебек үк эшләячәк", - диде Татарстан Республикасының Архив эше буенча Дәүләт комитеты рәисе. Ул әлеге эшнең бердәм архив мәгълүмат системасы аша оештырылачагын аңлатты.

Гөлнара Габдрахманова шулай ук республика Дәүләт архивының күчүе белән Росархив, РФ Оборона министрлыгы һәм башка кайбер эре ведомстволар белән эшләү тәҗрибәсенә ия махсуслаштырылган оешма шөгыльләнәчәген хәбәр итте. «Безнең хезмәткәрләр әлеге оешма вәкилләре белән бергә эшлиләр. Биредә бернинди югалту да була алмый. Ике тартмага салынган һәр тара һәм транспорт та пломблаштырылачак. Аны хезмәткәрләр озата йөри. Китү һәм кабул итү буенча актлар төзелә. Без бөтен логистикага исәп тоттык инде. 15 декабрьгә Себер тракты һәм 8 нче Март урамнары тулысынча бушатылачак", - дип өстәде архив ведомствосы башлыгы.