Татарстанда 2 млн 210 мең кв метр торак төзелгән, бу агымдагы елга планлаштырылган торакның 83%ын тәшкил итә

Татарстан Республикасында илкүләм проектлар һәм төзелеш тармагындагы республика программаларын гамәлгә ашыру турында ТР Хөкүмәте йортында узган киңәшмәдә ТР төзелеш, архитектура һәм торак-коммуналь хуҗалык министры Марат Айзатуллин җиткерде.

Киңәшмәне барлык муниципаль районнар белән видеоконференция режимында ТР Премьер-министр Алексей Песошин уздырды.

Республикада 6 илкүләм проект кысаларында гамәлгә ашырыла торган 95 объект буенча үтәлеш 89% тәшкил итә. Төзелештә 17 республика программасының үтәлеше бүгенге көндә 82% тәшкил итә, дип хәбәр итте Марат Айзатуллин.

Агымдагы ел башыннан бирле Татарстанда 2 млн 210 мең квадрат метр торак төзелгән, бу агымдагы ел планының 83%ын тәшкил итә, узган ел белән чагыштырганда 8%ка күбрәк.

Коммерцияле торак төзелеше шул күләмнең 702 мең кв метрын тәшкил итә, планның 55%ы, бу файдалануга тапшырылган 90 күп фатирлы йорт.

Социаль ипотека буенча планлаштырылган 280 мең кв метр мәйданнан 116 мең кв метрлы торак төзелгән, яисә 161 йорт, ул 41%ка башкарылган. Тагын 137 мең кв метр мәйданлы 37 йорт төзелеп бетә.

Шәхси торак торак төзү буенча уңай динамика дәвам итә. Бүгенгә 10 307 йорт төзелгән, бу планның 124%ын тәшкил итә. 

Контроль-күзәтчелек органнары төзелеш объектларын тикшерүләрен дәвам итәләр. Ел башыннан 1356 тикшерү булган. Барлыгы гомуми суммасы 5 млн 238 мең сум булган 94 карар чыгарылган.

ТР ның Баш инвестиция-төзелеш идарәсе ел башыннан объектларга 564 тапкыр тикшерү белән чыкты. Тикшерү нәтиҗәләре буенча ачыкланган хезмәт тәртибен бозулар оператив рәвештә бетерелә: 918 хезмәт тәртибен бозуның 910ы бетерелде. Марат Айзатуллин ассызыклаганча, куркынычсызлыкны күзәтү йомшарырга тиеш түгел.