Рөстәм Миңнеханов Covid-19: Тынычланырлык сәбәп юк, экспертлар көзен авыру көчәячәге турында сөйли

Бүген ТР Хөкүмәте Йортында узган республика киңәшмәсендә Covid-19 таралышына каршы көрәш чаралары һәм инфекцияне профилактикалау чараларын оештыру мәсьәләләре турында фикер алыштылар.

Киңәшмәне барлык муниципаль районнар белән видеоконференцэлемтә режимында Татарстан Республикасы Президенты Рөстәм Миңнеханов уздырды. Киңәшмәдә Татарстан Премьер-министры Алексей Песошин да катнашты.

Рөстәм Миңнеханов билгеләп үткәнчә, Covid авыруының яңа очраклары арту темпы 19 атна эчендә 0,26% тәшкил итә. 989 мең 748 татарстанлы вакцина алган. Соңгы тәүлек эчендә 6 мең 350 граждан прививка ясаткан. Президент ассызыклаганча, республикада җитәрлек күләмдә 4 төр вакцина бар.

Рөстәм Миңнеханов коронавирусны профилактикалау буенча барлык чараларны да катгый үтәргә өндәде. Элегрәк Роспотребнадзор 314 объектны тикшерде һәм 16%ында кагыйдәләрне бозулар ачыкланган. «Әлегә тынычланырлык сәбәп юк. Экспертлар пандемиянең көзен көчәячәге турында сөйли. Бу көчәюгә Татарстан Республикасы төзелеш, архитектура һәм ТКХ министры Фәрит Хәнифов бирмәс өчен Роспотребнадзорның барлык таләпләрен үтәргә һәм вакцина ясатырга кирәк", - дип өстәде ТР Президенты.

Кулланучылар хокукларын яклау һәм кеше иминлеге өлкәсендә күзәтчелек федераль хезмәтенең ТР буенча идарәсе җитәкчесе Марина Патяшина үз нотыгында вакцина алырга теләмәгән гражданнарның иң киң таралган дәлилләрен билгеләп үтте һәм аларның һәркайсына җавап бирде. Ведомство башлыгы хәбәр иткәнчә, барлык вакциналар да клиник сынауны гражданнар әйләнешенә кертү өчен кирәкле булган вакцина сынауларын төгәлләгәннәр. Әйе, вакцинациядән соң да авырырга мөмкин, ләкин бу очракта авыр формалар, өзлегүләр һәм үлем-китем булмаячак. Авырган кешеләргә дә прививка ясатырга киңәш ителә, чөнки иммунитетның озак саклануы билгеле түгел.

"Прививка яңа штаммнардан саклый аламы? Галимнәр мәгълүматларына караганда, вирусның мутациясе вакцина төзегәндә кулланылган өлешләргә кагылмый. Барлык яңа штаммнарга карата вакциналарның нәтиҗәлелеге исбатланды", - диде Марина Патяшина.

Кулланучылар хокукларын яклау һәм кеше иминлеге өлкәсендә күзәтчелек федераль хезмәтенең ТР буенча идарәсе башлыгы сүзләренә караганда, кайбер кешеләр сәламәтлекләренә бәйле проблемалар аркасында прививка ясарга теләми. «Әмма теләсә нинди хроник авырулары булган кешеләргә беренче чиратта прививка ясатырга кирәк, чөнки алар авыр өзлегүләргә дучар булырга мөмкин. Вакцинация алдыннан аларга вакцинаны оптималь сайлау өчен дәвалаучы табиб консультациясе кирәк», - дип өстәде Марина Патяшина.