Татарстан Президенты Мәскәүдә «Бердәм Россия» партиясе съездында катнашты

Бүген Татарстан Республикасы Президенты Рөстәм Миңнеханов Мәскәүгә эш сәфәре кысаларында «Бердәм Россия» бөтенроссия сәяси партиясенең XX съездының икенче этабында катнашты.

Съездда катнашучыларга Россия Президенты Владимир Путин мөрәҗәгать итте. Ул искәрткәнчә, партия съездының беренче этабы июнь аенда узды, шуннан соң төбәкләрдә, муниципалитетларда, урыннарда эш алып барылды. «Без сезнең белән мондый турыдан-туры, кызыклы диалогның ни дәрәҗәдә мөһим булуын беләбез. Бары тик кешеләрне ишетергә, аларның проблемаларын, кайгыртуларын аңларга һәм, димәк, гражданнарның тәкъдимнәрен, инициативаларын партиянең сайлау алды программасына кертергә була», - диде Владимир Путин.

Дәүләт башлыгы билгеләп үткәнчә, илнең барлык төбәкләрендә яшәүчеләр «Бердәм Россия» партия программасының чын авторлары булдылар, шуңа күрә программаның үзен, һичшиксез, халыкныкы дип атарга мөмкин.

РФ Президенты билгеләп үткәнчә, «Бердәм Россия» сәяси, мораль йөкләмәне – билгеләнгән планнарны тормышка ашыруга ирешүне үз өстенә ала. «Партия программасы кеше өчен төзелгән, максаты – аның иминлеген тәэмин итү, тормыш сыйфатын күтәрү. Һәм өстенлекле бурычларның берсе – өлкән буын кешеләре, пенсионерлар турында кайгырту. Монда бөтен бер комплекс проблемаларны хәл итәргә кирәк, шул исәптән сәламәтлек саклау, өйдә ярдәм системасын үстерү дә», - диде РФ Президенты.

Ул ассызыклаганча, турыдан-туры ярдәм сыйфатында пенсионерларга 10 мең сум күләмендә бер тапкыр бирелә торган түләүне тәэмин итәргә кирәк. Владимир Путин түләүне мөмкин кадәр тиз арада оештырырга һәм кешеләрне мәшәкатьләрдән һәм белешмәләр җыюдан арындырырга кушты.

Дәүләт башлыгы хәрби хезмәткәрләргә бер тапкыр бирелә торган түләү турында да әйтте. Ул, хәрби хезмәткәрләр дәрәҗәсенә карамастан, бер үк күләмдә түләүне оештырырга, шулай ук бу түләүне хәрби училище курсантларына һәм хокук саклау органнары хезмәткәрләренә таратырга тәкъдим итте.

Владимир Путин эшсезлек темасына аерым тукталды: «Яшьләр мәшгульлегенә ярдәм итү буенча махсус программа, эшсезлекнең кискен проблемасы белән очраша торган төбәкләр өчен адреслы чаралар әзерләргә һәм «Бердәм Россия» партиясеннән әлеге планнарны тормышка ашыруга энергияле керешүне сорыйм. Моннан тыш, мөмкинлекләре чикләнгән кешеләр өчен мәшгульлек буенча махсус программа эшләргә кирәк».

Россия Президенты белдергәнчә, ил суверенитетын ышанычлы яклау, шулай ук җәмгыятьне берләштерү, иҗади максатларга ирешү – партия бурычы. «Бердәм Россия» партиясе, гомум илкүләм көн тәртибен гамәлгә ашыру өстендә эшне дәвам итү өчен, сайлауларга бара. Бу, барыннан да элек, Россия халкын саклау, һәр кешенең үз-үзен тоту һәм үсеше өчен мөмкинлекләр тудыру. Безнең уртак бурычыбыз – Россия суверенитетын ышанычлы яклау, җәмгыятьне иҗади максатларга ирешү өчен берләштерү, масштаблы чакыруларга җавап бирү һәм ышанычлы алга бару», - дип өстәде дәүләт башлыгы.