Рөстәм Миңнеханов «КАМАЗ» заводында Россия ГХМ башлыгы урынбасары белән очрашты

Бүген Татарстан Республикасы Президенты Рөстәм Миңнеханов Чаллы шәһәренә эш сәфәренә килде. Визиты барышында ул РФ Гражданнар оборонасы эшләре, гадәттән тыш хәлләр һәм табигый бәла-казалар нәтиҗәләрен бетерү министры урынбасары Андрей Гурович белән очрашты һәм аның белән бергә «КАМАЗ» фәнни-җитештерү үзәгендә булды.

Андрей Гурович Гадәттән тыш хәлләр министрлыгының зур делегациясен җитәкли, ул бүген «КАМАЗ»да булды. Төп максаты – яңа буын янгын һәм авария-коткару техникасын булдыру кысаларында Россия ГХМ һәм «КАМАЗ» ГАҖ арасындагы хезмәттәшлек, шулай ук компаниянең топ-менеджерлары белән алдагы хезмәттәшлекнең төрле мәсьәләләре буенча киңәшмәләр уздыру.

Рөстәм Миңнеханов һәм Андрей Гурович компаниянең фәнни-техник үзәген карадылар, анда аларга «КАМАЗ» автомобильләренең яңа модельләрен, шул исәптән яңа янгын сүндерү-коткару техникасы үрнәкләрен һәм пилотсыз автомобильләрне күрсәттеләр.

Аннары Татарстан Республикасы Президенты һәм Россия ГХМ башлыгы урынбасары «Вираж» автодромына юнәлделәр, анда «КАМАЗ-Мастер» командасы белән очраштылар һәм узышларда катнашучы машиналарда йөрделәр.

Ахырда Рөстәм Миңнеханов һәм Андрей Гурович, хезмәттәшлекнең киләчәк юнәлешләре турында фикер алышып, очрашу уздырдылар.