Татарстан Президенты «Татнефтехиминвестхолдинг» Директорлар советының чираттагы утырышын уздырды

Татарстанның нефть, газ, химия комплексының база компанияләре өчен беренче яртыеллык финанс нәтиҗәләре буенча рекордлы булды – ярты ел эчендә керем күләме 2016 елдагы кебек үк. Эре тоннажлы химия предприятиеләре максималь табыш, керем һәм салым дәрәҗәсен көтә. Бу хакта «Татнефтехиминвест-холдинг» ААҖ генераль директоры Рафинат Яруллин холдингның Директорлар советы утырышында хәбәр итте. Бүген Чараны Татарстан Республикасы Президенты Рөстәм Миңнеханов уздырды.

Рафинат Яруллин билгеләп үткәнчә, югары нәтиҗәләр, нигездә, бәяләрнең кискен артуы белән тәэмин ителгән. База предприятиеләренең барлык дәрәҗәләре бюджетларга беренче яртыеллыкта якынча 300 млрд. сум акча күчергән һәм 2019 ел күрсәткеченнән 23%ка арткан.

Республиканың берләштерелгән бюджетына түләүләр 2019 ел дәрәҗәсенә кадәр торгызылган. Беренче яртыеллыкта 39 млрд сум түләнгән. Химия һәм нефть химиясе секторындагы түләүләрнең артуы ягулык секторында кимү белән компенсацияләгән.

2021 елның беренче яртыеллыгы нәтиҗәләре буенча НГХКның база компанияләре җитештерү күләмен узган ел белән чагыштырганда 2%ка арттырганнар. «Татнефть»тә һәм шиналар комплексында үсеш 2020 елның түбән базасы фонында торгызу характерына ия. Узган ел белән чагыштырганда «ТАИФ-НК»да нефть эшкәртү, «Казаноргсинтез»да продукция җитештерү күләмнәре кимегән.

«ТАНЕКО», «Түбән Кама Нефтехим», «Аммоний», «Нәфис Косметикс», «Түбән Каматехуглерод» һәм "КВАРТ" җитештерүне 2019 ел белән чагыштырганда да арттыра алдылар. Бу глобаль икътисадны торгызу һәм дөньяда эре тоннажлы химия продукциясенең аерым төрләренә кытлык булу белән бәйле.

База компанияләре хезмәткәрләренең гомуми саны үзгәрмәде диярлек. Иң зур үсеш темпы «ТАНЕКО»да билгеләнгән. "Карпов химзаводы" һәм «КВАРТ»та эшләүчеләр саны кими. Әлеге предприятиеләр хезмәткәрләрнең китүен хезмәт хакларын арттыру белән компенсацияләргә тырышалар. «Карпов химзаводы» быел республика буенча уртачадан югарыракка хезмәт хакы дәрәҗәсен күтәрә алды, «Кварт»та әлегә артта калу саклана, дип билгеләп үтте «Татнефтехиминвест-холдинг» генераль директоры.

Шулай ук бүген утырышта берничә инновацион проект каралды. Сәнәгать объектларын демонтажлауга комплекслы якын килүне Екатеринбургның «Реформа» ДСК («Ремонтно-строительная группа» ҖЧҖ) президенты Григорий Фрич тәкъдим итте. Компания проект-тикшеренү эшләре алып бара, объектларны һәм инженерлык челтәрләрен сүтеп ала, шартлаткыч эшләр башкара, мәйданчыкларны рекультивацияли. "Реформа" шулай ук металл, бетон, кирпеч, пластик эшкәртү белән шөгыльләнә. Бу заказчы акчаларын янга калдыра. Компания төрле объектларны – Кремль сарае корпусларын һәм «Зимняя вишня» сәүдә үзәген, «Уфалейникель» металлургия комплексын һәм «Роснефть» Куйбышев нефть эшкәртү заводы җайланмасын демонтажлаган. Татарстанда шулай ук эксплуатациядән чыгарылган җайланмалар һәм җитештерүләр бар.

ТР Президенты теманың мөһимлеген билгеләп үтте һәм «Татнефть» - ТАНЕКО нефть эшкәртү заводы төзегәндә калдыкларны утильләштерүне күзәтүе турында сөйләде.

«Җитештерү культурасы барлыкка килергә тиеш, шуңа күрә профессионалларны җәлеп итәргә кирәк, - дип ассызыклады ул. - Бу бигрәк тә нефть химиясе комплексын модернизацияләү шартларында мөһим".

«Маэрск Восточная Европа» компаниясенең сатулар буенча директоры Александр Бобраков Татарстаннан нефть химиясе продукциясен контейнерларда чыгарырга тәкъдим итте. Бу предприятиеләргә транспорт чыгымнарын шактый киметергә һәм йөк транзит тизлеген арттырырга мөмкинлек бирәчәк.

Татарстан Президенты республиканың эре предприятиеләренә «Маэрск» белән эшне җайга салырга кушты. «Татнефть» һәм «Түбән Кама нефтехим» (ТАИФ төркеме) бу өлкәдә хезмәттәшлек итәргә әзер булуларын белдерделәр.

Мөлкәт һәм инфраструктура объектлары белән идарә итүне цифрлаштыру «Бипиум» ҖЧҖ генераль директоры Виктор Никитин чыгышының темасы булды. Компаниянең баш офисы Казанда урнашкан. «Бипиум», Иннополис резиденты буларак, БДБ базарына чыгарга җыена. Эре предприятиеләрнең күп милек объектлары бар, әмма еш кына алар белән тиешенчә идарә итмиләр, дип билгеләп үтте нотыкчы. Бу компанияләр өчен финанс һәм башка куркынычлар тудыра. Bpium системасы килешү шаблоннарын булдырырга, милек һәм алыш-бирешләрнең реестрын алып барырга, килешүләрнең үтәлешен контрольдә тотарга мөмкинлек бирә.

"Программа яхшы, шактый прогрессив һәм уңышлы, - диде Рөстәм Миңнеханов. - Минемчә, егетләр уйлап табучылар буларак уңышка ирешкәннәр".

BenzUp кушымтасы автомобильләргә ягулык салу станцияләре өчен мөмкинлекне арттыра, аларның табыш хисабына дөрес һәм сыгылмалы бәяләргә сатуны хасил итә. Бу хакта «ОМТ-Консалт» ҖЧҖ генераль директоры («Иннополис» МИЗ резиденты) Дамир Шаһимәрданов хәбәр итте. «Екатеринбург» һәм «Ефәк нефть» (Shell) челтәрләре белән килешүләр төзелгән инде. Ул «Татнефть-АЗС-Көнбатыш» ҖЧҖне мисал итеп китерде, ул акчаны янга калдырды һәм кушымта ярдәмендә кайбер процессларны автоматлаштырды. Дамир Шаһимәрданов «Татнефть» һәм «ТАИФ» компанияләренә әлеге продуктны төрле төбәкләргә масштабларга тәкъдим итте.