Рөстәм Миңнеханов: Бүген кешеләрнең вакцинациягә карата мөнәсәбәте үзгәрде, прививка ясарга теләүчеләр саны арта

Татарстан Президенты Рөстәм Миңнеханов коронавирустан вакцина ясарга теләүче татарстанлылар саны артуын билгеләп үтте. Бүген ул бу хакта Татарстан Республикасы Хөкүмәте Йортында узган республика киңәшмәсендә хәбәр итте.

Рөстәм Миңнеханов ассызыклаганча, Covid-19гә бәйле хәл киеренке. Республикада да авырулар санының артуы күзәтелә. Президент ассызыклаганча, сәламәтлек саклау өлкәсе яңа өндәүләргә әзер: ятаклар фонды әзерләнгән, медицина учреждениеләре кирәкле дарулар белән тәэмин ителгән.

«Без авыруның ничек баруын күрәбез. Хәзер авырулар арасында яшьләр саны артты. Кызганычка каршы, авыру да үзгәрә, катлаулырак формада уза», - диде Рөстәм Миңнеханов.

Ул искәрткәнчә, бүгенге көндә коронавирус инфекциясеннән яклауның ике ысулы бар: гамәлдәге эпидемиягә каршы чараларны катгый үтәү һәм вакцинация. «Бүген кешеләрнең аңы бераз үзгәрде. Тәүлегенә 10-11 мең кеше прививка ясата. Вакциналар бар, пунктлар эшли. Барлык шартлар да тудырылган", - дип өстәде ТР Президенты.