Рөстәм Миңнеханов Мьянма дәүләт Административ советы рәисе, Кораллы Көчләр Баш командующие, баш генералы Мин Аунг Хлайн белән очрашты

Бүген Татарстан Республикасы Президенты Рөстәм Миңнеханов Мьянма дәүләт Административ советы рәисе, Кораллы Көчләр Баш командующие, баш генералы Мин Аунг Хлайн белән очрашты.

Очрашу Казан Кремлендә узды. 

Мин Аунг Хлайн Татарстанга эш визиты белән килде (2021 елның 24-26 июнендә).

Республикада Дәүләт Административ советы рәисе, Мьянма Кораллы көчләре баш командующие "КАМАЗ" ГАҖдә булды, "Эйдос-Медицина" компаниясе эше һәм продукциясе белән танышты, шулай ук А. М. Горький исемендәге Яшел Үзән заводы, Казан вертолет заводының җитештерү мәйданнарын һәм модельләрен карады.

Кунакларны сәламләп, Рөстәм Миңнеханов билгеләгәнчә, Мин Аунг Хлайн әфәндене Россиягә визиты кысаларында Татарстанда кабул итү зур мәртәбә.

"Мьянма - Россиянең Көньяк-Көнчыгыш Азиядәге күптәнге һәм ышанычлы партнеры. Россия-Мьянма дипломатик мөнәсәбәтләре тарихы 70 елдан артык, - дип искәртте ул. - Соңгы вакытта төрле өлкәләрдә Россия-Мьянма хезмәттәшлеген киңәйтү тенденциясе ныгый бара. Хәрби-техник хезмәттәшлек югары дәрәҗәдә".

"Татарстан Россия-Мьянма мөнәсәбәтләре кысаларында сезнең ил белән хезмәттәшлеккә зур игътибар бирә", - диде Рөстәм Миңнеханов.

Татарстан Президенты шулай ук искә төшергәнчә, ул Мьянмада 2013 елда булган. Моннан тыш, Татарстанга Мьянма бизнесы вәкилләре дә килде. Әйтик, узган елның февралендә кайбер Татарстан предприятиеләре вәкилләре Мьянмага эш визиты белән барды – анда хезмәттәшлек мөмкинлекләре турында фикер алышканнар.

Соңгы елларда безнең товар әйләнеше үсеше күзәтелә, диде Рөстәм Миңнеханов. Ул шулай ук Татарстанга бу визит хезмәттәшлек үсешенә, шул исәптән сәүдәгә дә яхшы этәргеч бирәчәгенә ышаныч белдерде. Барыннан да элек, бу - «КАМАЗ» ГАҖ продукциясе (сәнәгать гиганты Мьянмада 2016 елдан бирле эшли, автомобильләр белән тәэмин итү гамәлгә ашырыла). 

Рөстәм Миңнеханов кыскача гына регионның сәнәгать потенциалы, монда урнашкан эре производстволар турында сөйләде. "Без хезмәттәшлек өчен ачык һәм Россия-Мьянма мөнәсәбәтләре кысаларында безнең элемтәләрне алга таба үстерүгә әзер", - диде Рөстәм Миңнеханов. Ул ассызыклаганча, хезмәттәшлекне үстерү өчен күп юнәлешләр бар.