Рөстәм Миңнеханов кече нефть компанияләре белән киңәшмәдә: 1 кварталда Татарстанда нефть чыгару күләме 8,1 млн тоннадан артып киткән, шул исәптән кече нефть компанияләре - 1,7 млн тонна нефть

Бүген Татарстан Республикасы Президенты Рөстәм Миңнеханов Татарстан Республикасының кече нефть компанияләре җитәкчеләре белән чираттагы киңәшмә уздырды.

Киңәшмә Татарстан Республикасы Хөкүмәте Йортында узды һәм Татарстан Республикасы кече нефть компанияләренең 2021 елның I кварталында эш йомгакларына һәм киләчәк үсеш бурычларына багышланды.

Рөстәм Миңнеханов искә төшергәнчә, Россия Энергетика министрлыгы мәгълүматлары буенча, 2021 елның 1 кварталында илдә 125 млн тонна нефть чыгарылган. Татарстан буенча нефть чыгару күләме 8 млн. 106 мең тоннадан артып киткән, шул исәптән кече нефть компанияләре тарафыннан 1 млн.718 мең тонна нефть чыгарылган. Шул ук вакытта кече компанияләр буенча чыгару 3,6%ка кимегән дә.

«Беренче кварталда без ОПЕК+ базарга яңа килешүнең уңай йогынтысын күрдек. ОПЕК нефть кәрҗиненең бәясе 2019 елның кризиска кадәрге уртача дәрәҗәсенә әйләнеп кайтты – февраль аеннан тотрыклы рәвештә бер баррель өчен 60 доллардан артык тора. ОПЕК+ мониторинг комитеты утырышында агымдагы вәзгыятьне исәпкә алып, апрель башында акрынлап чикләүләрне йомшарту турында карар кабул ителде. Май аеннан июль аена кадәр чорда нефть чыгару тәүлегенә 1,1 млн.барельдән артык тәшкил итәчәк», - диде Рөстәм Миңнеханов.

Татарстан Президенты шулай ук 1 нче кварталның сәнәгать җитештерүе нәтиҗәләрен дә билгеләде: республикада төп макроикътисадый күрсәткечләр кимү билгеләп үтелде. Сәнәгать җитештерүе күләме якынча 821 млрд. сум тәшкил иткән, сәнәгать җитештерүе индексы (ИПП) – 97,7%.

2021 елның 1 нче кварталында кече нефть компанияләре тарафыннан сәнәгать һәм экологик иминлек таләпләрен үтәү турында Экологик, технологик һәм атом күзәтчелеге буенча федераль хезмәтнең Идел буе идарәсе җитәкчесе Азат Мөбарәкшин сөйләде. Ул хәбәр иткәнчә, куркыныч җитештерү объектларының дәүләт реестрында бүгенге көндә кече нефть компанияләренең 350 объекты бар. Аларның 37се 1 куркыныч классына карый.

Азат Мөбарәкшин соңгы 3 ел нәтиҗәләре буенча мәгълүматларны китерде – ул үткәрелгән тикшерүләр санын, ачыкланган бозулар санын һәм штраф суммасын атады. Бозуларның кимүенә уңай тенденция билгеләнгән, диде ул, ләкин 2021 ел нәтиҗәләре буенча күрсәткечләрне чагыштырырга кирәк, чөнки 2020 елда мораторий һәм планлы тикшерүләрне гамәлдән чыгару кертелгән.

Аварияләрдә имгәнүләр динамикасы 2013 елдан алып китерелгән. ТР буенча Ростехнадзор идарәсе башлыгы искә төшергәнчә, 2021 елның 22 гыйнварында бер төркем бәхетсезлек очрагы булган. «Татарстанның кече нефть компанияләре» ҖЧҖ предприятиесе территориясендә предприятиенең 2 хезмәткәре һәлак булган һәм 2 подрядчы оешманың хезмәткәре авыр җәрәхәтләр алган. Хәзерге вакытта авария сәбәпләрен техник тикшерү дәвам итә, комиссиянең эш вакыты - 3 июньгә кадәр. Мондый хәлләрне булдырмау өчен чаралар күрергә кирәк", - диде Азат Мөбәрәкшин.

Агымдагы елның беренче кварталында ТР буенча Ростехнадзор идарәсе тарафыннан беренче класслы куркыныч объектларны 8 тикшерү үткәрелгән. 98 сәнәгать куркынычсызлыгы таләпләрен бозу очрагы ачыкланган, 7 вазыйфаи һәм өч юридик зат җаваплылыкка тартылган.

«Нефтеконсорциум МНК» АҖ генераль директорының беренче урынбасары-баш инженеры Олег Вышенский агымдагы елның 1 нче кварталында Татарстан Республикасы кече нефть компанияләренең эш нәтиҗәләрен тәкъдим итте. Кече нефть компанияләре тарафыннан 1 млн. 718 мең тонна нефть чыгарылган. Кече нефть компанияләре чыгарган нефтьнең чагыштырма зурлыгы республика буенча гомуми күләмнең 21%ын тәшкил итте. Нефть чыгару буенча билгеләнгән биремнәрне 25 кече нефть компаниясе үтәгән.

Хисап чорында кече нефть компанияләре тарафыннан 100 мең метр тау токымнары борауланган. 90 яңа скважина файдалануга тапшырылган.

2021 елда компанияләр 180 мең метр тау токымнарын борауларга планлаштыра. Капиталь кертемнәрне финанслауга 3 млрд. сум җибәрелгән, бу узган елның шул ук чоры күрсәткечләреннән 9%ка кимрәк.

Катламнарның (МУНП) нефть бирүчәнлеген арттыру алымнарын берничә кече нефть компаниясе кулланган. МУНП һәм нефть агымын интенсификацияләү хисабына алар тарафыннан 393 мең тонна нефть чыгарылган, ягъни барлык нефть күләменең 23%ы.

Киңәшмәдә «Татнефть» ГАҖ генераль директоры Наил Маһанов, Татарстан Республикасы Президентының нефть сәнәгате буенча ярдәмчесе Шәфәгать Тәхаветдинов, Татарстан Республикасы кече нефть компанияләре җитәкчеләре, республика министрлыклары һәм федераль башкарма хакимият органнарының территориаль структуралары җитәкчеләре һәм башкалар катнашты.