Рөстәм Миңнеханов «Трансмашхолдинг»АҖнең цифрлы трансформация буенча сессиясендә: Казанда пилотсыз метро төзү буенча уртак проектыбызның уңышлы тормышка ашырылуын көтәбез

Бүген Татарстан Республикасы Президенты Рөстәм Миңнеханов Цифрлы трансформация буенча «Трансмашхолдинг» АҖ стратегик сессиясен ачуда катнашты.

Чара видеоконференция режимында һәм дә Иннополис шәһәре территориясендә узды.

Сессиядә катнашучыларга сәламләү сүзе белән Татарстан Республикасы Президенты Рөстәм Миңнеханов, «Трансмашхолдинг» АҖ президенты Андрей Бокарев мөрәҗәгать итте.

Безнең республика «Трансмашхолдинг» АҖ белән беренче ел гына хезмәттәшлек итми, дип искәртте Рөстәм Миңнеханов, һәм компания – безнең стратегик партнерыбыз. Ул билгеләп үткәнчә, республика өчен хәрәкәт составының Россиянең иң эре җитештерүчеләренең берсе булган  компаниянең топ-менеджментын кабул итү – зур дәрәҗә. Татарстанның шулай ук «Трансмашхолдинг» АҖ белән шәһәр җәмәгать транспортын үстерү өлкәсендә уңай тәҗрибәсе бар.

Соңгы елларда Татарстан цифрлаштыру өлкәсендә лидер төбәкләрнең берсе булды, һәм ил картасында перспектив үсеш ноктасы – яңа Иннополис шәһәре, анда шул ук исемдәге университет, махсус икътисадый зона уңышлы үсеш ала. Иннополиста шулай ук яңа эшләнмәләр һәм сервислар, әйберләр Интернеты, 5G уңышлы гамәлгә кертелә, шәһәр территориясендә шулай ук продуктлар китереп торучы робот һәм пилотсыз такси эшли. Хәзерге вакытта Иннополиста 5 меңнән артык кеше яши. Ул ассызыклаганча, Иннополис экосистемасында университет аерым урын алып тора (укырга керүче абитуриентларның уртача балы буенча илебез югары уку йортлары өчлегенә керә, 2020 елда уртача балл 95,7% тәшкил итәчәк). Иннополис университеты базасында икътисадны квалификацияле ИТ-белгечләр белән тәэмин итүче терәк мәгариф үзәге булдырылган.

Бүген «Иннополис» МИЗда 115 резидент-компания һәм 29 партнер, 4 меңнән артык эш урыны булдырылган.

«Трансмашхолдинг» АҖнең заманча метро, электропоездлар һәм трамвайлар поездларын булдыру өлкәсендә зур компетенцияләре бар. Без шулай ук Казанда пилотсыз метро төзү буенча уртак проектыбызның уңышлы тормышка ашырылуын көтәбез", - диде Рөстәм Миңнеханов. - Безнең өчен кадрлар әзерләү юнәлеше буенча Иннополис һәм «Трансмашхолдинг» арасындагы хезмәттәшлекне үстерү мөһим. Әйтик, 2020 елда компаниянең 258 белгече белем алган. Моннан тыш, бу – машина белән укыту технологиясен, блокчейннарны үстерү. Стратегик сессия кысаларында Иннополис университеты базасында үзебезнең һәм чит ил спикерлары үз белемнәре белән уртаклашачак».

Рөстәм Миңнеханов «Трансмашхолдинг» АҖ җитәкчелегенә хезмәттәшлек өчен рәхмәт белдерде һәм стратегик сессиядә катнашучыларга нәтиҗәле эш теләде.

Белешмә өчен:

2018 елда «Трансмашхолдинг» компаниясе «Сколково» МШУ һәм «2050» ҖЧҖ ярдәмендә цифрлы трансформация буенча стратегик сессия уздырган иде.